مغربی کنارے پر صہیونی فوجیوں کا حملہ ،4 فلسطینی گرفتار

?️ 4 دسمبر 2021

سچ خبریں:مغربی کنارے پر صہیونی فوجیوں کےحملے کے بعد چار فلسطینیوں کو گرفتار کر لیا گیا۔
العہدچینل کی رپورٹ کے مطابق مقبوضہ فلسطین کے مختلف علاقوں میں فلسطینیوں کے خلاف صیہونیوں کی جارحانہ کاروائیوں کا سلسلہ بدستور جاری ہے،اس سلسلے میں صہیونی ملیشیا نے مغربی کنارے پر حملہ کیا۔

رپورٹ کے مطابق مغربی کنارے پر صیہونی فوجیوں کے اس وحشیانہ حملے کے بعد ان کے اور فلسطینی شہریوں کے درمیان شدید جھڑپیں ہوئیں جبکہ صیہونیوں نے جھڑپوں کے دوران چار فلسطینیوں کو گرفتار کر لیا۔

واضح رہے کہ حال ہی میں فلسطینی مزاحمتی گروپوں کے مشترکہ چیمبر نے مقبوضہ بیت المقدس اور مغربی کنارے میں صیہونی حکومت کے حالیہ جرائم کی شدید مذمت کی ہے، فلسطینی مزاحمتی گروپوں کے مشترکہ چیمبر نے ایک بیان میں کہا ہے کہ وہ فلسطین میں جاری واقعات کے ساتھ ساتھ اسرائیلی حکام کی طرف سے فلسطینیوں پر نئی شرائط مسلط کرنے کی کوششوں پر بھی نظر رکھے ہوئے ہے۔

بیان میں صیہونی حکومت کو مخاطب کرتے ہوئے کہا گیاہے کہ فلسطینی عوام کے خلاف صیہونی حکومت کے اس خطرناک حد تک جرائم کا تقاضا ہے کہ ہم اس پر فیصلہ کن رد عمل ظاہر کریں، یہ فطری بات ہے کہ ان جرائم کا تسلسل حالات کو مزید کشیدہ بنا دے گا، بیان میں یہ بھی کہا گیا ہے کہ صیہونی حکومت یروشلم اور مغربی کنارے میں فلسطینیوں کے خلاف اپنے جرائم کے نتائج کی ذمہ دار ہے۔

انھوں نے مزید کہا کہ ہم صیہونیوں کو ان کے ماضی کے جرائم کا تاوان ادا کرنے کے بجائے اب نئے جرائم کرنے کی اجازت نہیں دیں گے۔