فرانس کا ایفل ٹاور کی بجلی وقت سے پہلے بند کرنے کا اعلان

?️ 14 ستمبر 2022

سچ خبریں:بجلی اور توانائی کی بڑھتی ہوئی قیمتوں سے نمٹنے کے لیے پیرس نے اپنی تاریخی یادگاروں بشمول ایفل ٹاور کی روشنیاں وقت سے پہلے بند کرنے کا اعلان کیا ہے۔

اے ایف پی خبر رساں ادارے کی رپورٹ کے مطابق فرانس کے دارالحکومت پیرس شہر کے حکام نے اعلان کیا کہ یوکرین جنگ کے اثرات اور روس کے خلاف عائد پابندیوں کے باعث بجلی کی قیمتوں میں اضافے سے نمٹنے کے لیے ایفل ٹاور سمیت اس ملک کی تاریخی عمارتوں کی بجلی مقررہ وقت سے پہلنے بند کر دی جائے گی۔

واضح رہے کہ اس فیصلے سے پیرس شہر کی زیادہ تر تاریخی یادگاریں مقامی وقت کے مطابق رات 10 بجے سے اندھیرے میں ڈوب جائیں گی جو روشنی کے شہر کی سیر کرنے والے لاکھوں سیاحوں کے لیے مایوس کن ہو گا،یاد رہے کہ ایفل ٹاور جو عام طور پر صبح ایک بجے تک روشن رہتا ہے اور ہر گھنٹے میں ایک بار سفید روشنی سے چمکتا ہے، اب مقررہ وقت سے پہلے اس میں اندھیرا چھا جائے گا۔

پیرس کے میئر این ہڈالگو نے اس خبر کا اعلان کرتے ہوئے کہا کہ شہر کی حفاظت کو یقینی بنانے کے لیے اسٹریٹ لائٹنگ کو برقرار رکھا جائے گا، انہوں نے کہا کہ توانائی کے زیادہ سے زیادہ کم استعمال” کے منصوبے کا ہدف توانائی کی کھپت کو 10% تک کم کرنا ہے جو 10 ملین یورو کی بچت کرکے بڑھتے ہوئے اخراجات کے نقصان دہ اثرات کو کم کر سکتا ہے۔