فرانس میں فلسطینیوں کے حق میں مظاہروں پر پابندی

?️ 15 مئی 2021

سچ خبریں:فرانس کی حکومت نے اسرائیل کی خدمت کرتے ہوئے مظلوم فلسطینیوں کے حق میں بولنے پر پابندی کردی ہے نیز اس سلسلہ میں پولیس کو خصوصی احکام جاری کیے ہیں۔
فرانسیسی خبررساں ایجنسی کی رپورٹ کے مطابق فرانس نے مظلوم فلسطینیوں کے حق میں مظاہروں پر پابندی عائد کردی اور اس ضمن میں پولیس کو خصوصی احکامات بھی جاری کردیئے گئے ہیں، فرانسیسی وزیراعظم نے کہا ہے کہ اسرائیل کو اپنے دفاع کا پورا حق حاصل ہے،اطلاعات کے مطابق اس ضمن میں فرانسیسی وزیرداخلہ جیرالڈ ڈرمینن نے پولیس کو احکامات بھی جاری کرد یئے ہیں کہ ہفتے اور اتوار کو فلسطین کی حمایت میں کئی جلوس اور ریلیاں منعقد کی جائیں گی جنہیں روکنا ہوگا۔ حیرت انگیز طور پر اس فیصلے سے قبل ہی بدھ کو پیرس میں مقبوضہ فلسطین اور غزہ پر اسرائیل کے وحشیانہ ظلم و جبر کے خلاف ایک ریلی پر کریک ڈاؤن کیا گیا۔

فرانسیسی وزیر نے خدشہ ظاہر کیا ہے کہ یہ مظاہرے مبینہ طور پر عین اسی طرح کے باہمی تصادم کی وجہ بن سکتےہیں جو 2014ء میں رونما ہوئے تھے،یاد رہے کہ سال 2014ء کے ماہ رمضان میں اسرائیلی فضائی حملوں میں غزہ بھر کی نصف عمارتیں تباہ ہوگئی تھیں اور سیکڑوں فلسطینی شہید ہوئے تھے۔

ادھر فرانسیسی صدر ایمانوئیل میکرون نے اسرائیلی وزیراعظم سے کہا ہے کہ اسرائیل کو اپنے دفاع کا پورا حق حاصل ہے، یہ بات انہوں نے اسرائیلی وزیراعظم بنیامین نیتن یاہو کے لیے جاری کردہ بیان میں کہی، بیان کے مطابق ایمانوئیل میکرون نے حماس کے راکٹ حملوں کی مذمت کی اور اسرائیلی وزیراعظم بنیامین نیتن یاہو سے کہا کہ اسرائیل کو اپنے دفاع کا پورا حق حاصل ہے۔