صہیونی فوج نے ایک ہفتے کے دوران لبنان پر 550 حملوں کا اعتراف کیا

سچ خبریں: صہیونی حکومت کی فوج نے ایک بیان میں اعتراف کیا ہے کہ اس نے گزشتہ ہفتے کے دوران لبنان میں 550 سے زائد اہداف کو نشانہ بنایا ہے۔

واضح رہے کہ لبنانی ذرائع کے مطابق گزشتہ ہفتے زیادہ تر شہری انفراسٹرکچر اور رہائشی مکانات خاص طور پر جنوبی لبنان میں صہیونی حکومت کے حملوں کا نشانہ بنے، صہیونی فوج نے اپنے اس جرم کی توجیہ میں یہ دعویٰ کیا ہے کہ یہ حملے حزب اللہ کے فوجی انفراسٹرکچر سے منسلک اہداف کے خلاف کیے گئے ہیں۔

صہیونی فوج نے اپنے بیان میں مزید دعویٰ کیا ہے کہ اس نے بعلبک میں حزب اللہ سے تعلق رکھنے والی فوجی عمارتوں، ہیڈکوارٹروں اور راکٹ لانچ کرنے والی پوزیشنوں پر حملے کیے ہیں۔ یہ دعویٰ ایسے وقت میں سامنے آیا ہے جب لبنانی شہداء اور متاثرین کی شناخت، جن میں شہری، خواتین اور بچے شامل ہیں، اس بات کی عکاسی کرتی ہے کہ وہ مقامات جہاں صہیونی حکومت کے حملے کیے گئے، غیر فوجی تھے۔