صہیونی حکومت کو غزہ کے سلسلہ میں اپنے وعدے پورےکرنے پر مجبور کر یں گے: فلسطینی مزاحمتی تحریک

?️ 16 اگست 2021

سچ خبریں:فلسطینی مزاحمتی کمیٹیوں کے ترجمان نے زور دے کر کہاکہ ہم صہیونی حکومت کو غزہ کا محاصرہ اٹھانے اور اسے دوبارہ تعمیر کرنے کے اپنے وعدوں کو پورا کرنے پر مجبور کریں گے۔
فلسطین الیوم کی رپورٹ کے مطابق ابو مجاہد کے نام سے مشہور فلسطینی مزاحمتی کمیٹیوں کے ترجمان محمد البریم کا کہنا ہے کہ فلسطینی مزاحمتی گروپ آج پیر کو ایک مشترکہ اجلاس منعقد کریں گے تاکہ صیہونی حکومت کی جانب سے غزہ کے سلسلہ میں اپنے وعدوں پر عمل نہ کرنے کے خلاف متحد موقف اختیار کیا جاسکے، رپورٹ کے مطابق فلسطینی مزاحمتی کمیٹیوں کے ترجمان نے مزید کہا کہ صہیونی حکومت فلسطین کو مشکل میں ڈالنے کا ارادہ رکھتی ہے اور غزہ کی پٹی کا محاصرہ سخت کرکے مزاحمتی تحریک کے مرکز کو نشانہ بناتی ہے۔

انہوں نے مزید کہاکہ ابھی تک صہیونی حکومت کی طرف سے فلسطینی گروہوں کے مطالبات کے حوالے سے کوئی واضح جواب نہیں دیا گیا ہے،فلسطینی مزاحمتی کمیٹیوں کے ترجمان نے کہاکہ مزاحمت کے پاس صیہونی حکومت کو غزہ کا محاصرہ ہٹانے اور پٹی کی تعمیر نو کے سلسلہ میں کیے جانے والے وعدوں کو پورا کرنے پر مجبور کرنے کے اچھے طریقے ہیں۔

غزہ سے سامنے آنے والے کسی بھی خطرے کا جواب دینے کی اسرائیلی دھمکی پر فلسطینی مزاحمتی کمیٹیوں کے ترجمان نے کہاکہ اگر صہیونی حکومت نے کوئی حملہ کیا تو مزاحمت اور مشترکہ آپریشن روم شروع سے ہی رد عمل ظاہر کرے گا، مزاحمت فلسطینی عوام کی حمایت کرتی ہے اور دشمن اسے اچھی طرح جانتا ہے۔

ابو مجاہد نے کہاکہ مزاحمت صیہونی حکومت کے رویے پر لمحہ بہ لمحہ نظر رکھتی ہے اور جانتی ہے کہ دشمن کی طرف سے کسی حماقت پر ردعمل ظاہر کرنے کے لیے کون سے مناسب اوزار استعمال کیے جائیں۔