تجارتی جنگ کو ٹرمپ کی مزید ہوا

سچ خبریں:امریکی صدر  ڈونلڈ ٹرمپ نے اگست میں نافذ ہونے والی نئی پالیسی کا اعلان کیا کہ درآمدی ڈیوٹیاں 15 تا 50 فیصد کے درمیان ہوں گی۔

واشنگٹن امریکی صدر ڈونلڈ ٹرمپ نے اعلان کیا ہے کہ امریکہ کی جانب سے دیگر ممالک پر عائد کیے جانے والے تجارتی محصولات (ٹیرف) اب کم از کم 15 فیصد ہوں گے، جبکہ ان کی زیادہ سے زیادہ حد 50 فیصد تک ہو سکتی ہے،یہ اقدام آئندہ یکم اگست سے نافذ العمل ہوگا، جب کہ موجودہ بنیادی ٹیرف کی شرح کو 10 فیصد سے بڑھا کر 15 فیصد کر دیا گیا ہے۔

یہ بھی پڑھیں:انگریزی اشاعت: چین نے ٹرمپ کی تجارتی جنگ جیت لی

بلومبرگ کے مطابق، صدر ٹرمپ نے واشنگٹن میں مصنوعی ذہانت (AI) سے متعلق ایک اجلاس کے دوران کہا کہ ہم ایک سادہ اور واضح ٹیرف نظام لا رہے ہیں، جس میں مختلف ممالک کے لیے 15 سے 50 فیصد کے درمیان محصولات عائد کیے جائیں گے، بعض ممالک کے لیے یہ شرح 50 فیصد ہو گی، کیونکہ ہم ان سے جیسا سلوک چاہتے تھے، ویسا نہیں ہوا۔

ٹرمپ کے بیان سے ظاہر ہوتا ہے کہ امریکہ اپنی تجارتی پالیسی کو مزید سخت بنانے جا رہا ہے، خاص طور پر ان ممالک کے لیے جو ابھی تک واشنگٹن کے ساتھ کوئی تجارتی معاہدہ نہیں کر سکے۔

ٹرمپ نے اس ماہ کے آغاز میں کہا تھا کہ دنیا کے 150 سے زائد ممالک کو ایک خط بھیجا جائے گا جس میں انہیں ممکنہ طور پر 10 سے 15 فیصد کے درمیان ٹیرف سے متعلق آگاہ کیا جائے گا۔ اس وقت انہوں نے یہ بھی کہا تھا کہ ہم نے ابھی حتمی فیصلہ نہیں کیا،تاہم، تازہ بیان میں صدر نے واضح کر دیا ہے کہ کم از کم شرح اب 15 فیصد ہو گی۔

مزید پڑھیں:گارڈین: ٹرمپ کی تجارتی جنگ برازیل اور چین کو ایک دوسرے کے قریب لاتی ہے

ٹرمپ نے یہ بھی اعلان کیا کہ جاپان کے ساتھ ہونے والے معاہدے کے بعد، اس پر عائد پہلے سے طے شدہ 25 فیصد ٹیرف کو کم کر کے 15 فیصد کر دیا گیا ہے، جو ایک علامت ہے کہ معاہدے کرنے والے ممالک کو کچھ ریایتیں دی جا سکتی ہیں،انہوں نے کہا کہ کچھ ممالک کے لیے ہم بہت ہی سادہ ٹیرف لاگو کریں گے، کیونکہ ان کے ساتھ معاہدہ کرنا ممکن نہیں رہا،یورپی یونین کے ساتھ جاری مذاکرات کا ذکر کرتے ہوئے صدر نے اسے سنجیدہ قرار دیا اور کہا کہ اگر یورپی یونین امریکی کمپنیوں کے لیے اپنا بازار کھول دے تو ہم بھی ان پر کم ٹیرف لاگو کریں گے۔