صرف 100 ڈالر کے عوض جیل میں ایک سیاہ فام امریکی کی موت

?️ 28 جنوری 2023

سچ خبریں:امریکی جیل میں 51 سالہ سیاہ فام شخص کی موت ہوگئی جسے ضمانت کے لیے صرف 100 ڈالر کی ضرورت تھی تاہم وہ انہیں بھی ادا کرنے سے قاصر رہا جس کی وجہ سے وہ جیل ہی میں دنیا سے چلا گیا، اس خبر نے امریکی میڈیا میں ہنگامہ برپا کر رکھا ہے۔

لیری یوجین پرائس جونیئر نامی 51 سالہ سیاہ فام شخص امریکی میڈیا کی اہم ترین شخصیات میں سے ایک بن گیا ہے،اپنی کمزور ذہنی صلاحیت کے باعث ایک بس اسٹاپ کے قریب سے گزرتے ہوئے اس شخص نے اپنے ہاتھوں کو بندوق بنالیا اور اسٹیشن پر بس کے انتظار میں کھڑے لوگوں کو خیالی طور پر نشانہ بنایا جس کے بعد ریاست آرکنساس کے شہر فورٹ اسمتھ کی پولیس نے اس واقعے پر ردعمل ظاہر کرتے ہوئے اسے گرفتار کر کے حراستی مرکز بھیج دیا۔

پھر ایک جج نے اس پر 1000 ڈالر کا جرمانہ عائد کیا جس میں سے 100 ڈالر بطور ضمانت ادا کر کے اسے جیل سے رہا ہونے کے لیے کافی تھا لیکن یہ شخص 100 ڈالر بھی ادا نہ کر سکا۔

جیل میں رہنے سے اس کی ذہنی قوتیں مکمل طور پر ختم ہوگئیں اور چند روز قبل جسمانی معذوری اور بیماری کے باعث جیل میں انتقال کرگیا،اس 51 سالہ سیاہ فام شخص کی جیل میں موت کی خبر کے ساتھ ساتھ جیل سے رہائی کے لیے صرف 100 ڈالر ادا کرنے سے قاصر ہونے کی خبروں نے امریکی میڈیا میں خوب شور مچا رکھا ہے۔