روس کا کیف پر وسیع فضائی حملہ، 45 ہلاک اور زخمی

سچ خبریں: روس کے وسیع فضائی حملوں کے نتیجے میں یوکرین کے دارالحکومت کیف میں کم از کم 12 افراد ہلاک جبکہ 33 سے زائد زخمی ہو گئے۔ یہ اطلاع شہر کے میئر نے فراہم کی۔

خبر رساں ادارے روئٹرز کے مطابق، کیف شہر کے میئر نے تصدیق کی کہ روس کی جانب سے کیے گئے تازہ فضائی حملوں میں یہ جانی نقصان ہوا ہے۔

ادھر ماسکو کے میئر نے بھی اعلان کیا ہے کہ گزشتہ چوبیس گھنٹوں کے دوران روسی فضائی دفاعی نظام نے ماسکو کی طرف پیش قدمی کرنے والے 12 یوکرینی ڈرونز کو تباہ کر دیا۔ روسی حکام کے مطابق، یہ ڈرونز دارالحکومت کو نشانہ بنانے کی کوشش کر رہے تھے تاہم بروقت کارروائی کے باعث کوئی بڑا نقصان ہونے سے بچ گیا۔

ایک اور پیش رفت میں، روئٹرز نے رومانیہ کی وزارت دفاع کے حوالے سے بتایا ہے کہ روس کے یوکرین پر حملے کے دوران ایک ڈرون رومانیہ کی سرزمین پر گر کر تباہ ہو گیا۔ رومانیہ کے حکام اس واقعے کی تحقیقات کر رہے ہیں جبکہ نیٹو اتحادیوں کے ساتھ بھی رابطہ قائم کر لیا گیا ہے۔ یہ واقعہ نیٹو کے مشرقی حصے میں بڑھتی ہوئی کشیدگی کی ایک اور علامت قرار دیا جا رہا ہے۔

واضح رہے کہ روس کی جانب سے حالیہ دنوں میں یوکرین کے مختلف شہروں پر حملوں میں شدت آ گئی ہے، جس کے نتیجے میں شہری آبادی کو بھاری نقصان اٹھانا پڑ رہا ہے۔ بین الاقوامی برادری نے ان حملوں پر تشویش کا اظہار کیا ہے اور فوری جنگ بندی پر زور دیا ہے۔