حزب اللہ نے لبنانی حکومت کے ساتھ محاذ آرائی کے بارے میں سعودی میڈیا کے دعووں کو مسترد کر دیا

حزب اللہ نے لبنانی حکومت کے ساتھ محاذ آرائی کے بارے میں سعودی میڈیا کے دعووں کو مسترد کر دیا

حزب اللہ لبنان نے سعودی چینلز العربیہ اور الحدث کی جانب سے اس تنظیم پر حکومت لبنان کے ساتھ تصادم کی تیاری کے الزامات کو سختی سے مسترد کر دیا ہے۔ حزب اللہ نے ان دعوؤں کو مکمل طور پر جھوٹ، بے بنیاد اور ایک گمراہ کن پروپیگنڈہ قرار دیا ہے۔

حزب اللہ کی جانب سے جاری کردہ ایک باضابطہ بیان میں کہا گیا ہے کہ یہ رپورٹس دراصل ایک سازش کا حصہ ہیں، جن کا مقصد لبنان میں عدم استحکام اور خلفشار پیدا کرنا ہے۔ بیان میں واضح کیا گیا کہ ایسے جھوٹے اور خیالی دعوے صرف ان میڈیا اداروں کی سوچ کی پیداوار ہیں جو مخصوص اور مشکوک اہداف کی تکمیل چاہتے ہیں۔

تنظیم نے تمام میڈیا اداروں سے اپیل کی ہے کہ وہ ایسے جھوٹے دعوؤں کو نظر انداز کریں اور حزب اللہ کے مؤقف کو جاننے کے لیے صرف اس کے معتبر اور سرکاری ذرائع کا حوالہ دیں، خاص طور پر ان نازک حالات میں جہاں ملک کو اتحاد اور استحکام کی ضرورت ہے۔

حزب اللہ کے بیان میں مزید کہا گیا یہ افواہیں نہ صرف بے بنیاد ہیں بلکہ فتنہ انگیزی کا ہتھیار بھی ہیں، جنہیں ہم مکمل طور پر مسترد کرتے ہیں۔