امریکی فوج کی موجودگی میں توسیع محض وہم ہے:عراقی سیاسی تجزیہ کار

?️ 2 دسمبر 2025

 امریکی فوج کی موجودگی میں توسیع محض وہم ہے:عراقی سیاسی تجزیہ کار

ائتلافِ چارچوبِ ہم‌آہنگی کے رکن عصام شاکر نے عراق میں امریکی فوج کی ممکنہ مدتِ قیام میں توسیع سے متعلق افواہوں کو بے بنیاد قرار دیتے ہوئے کہا ہے کہ ملک میں غیر ملکی افواج، خصوصاً امریکیوں کے باقی رہنے کی کوئی گنجائش نہیں۔

عراقی خبر رساں ایجنسی المعلومہ کے مطابق شاکر نے یہ دعویٰ صرف ایک وہم قرار دیا ہے جو بعض حلقوں کی جانب سے پھیلایا جا رہا ہے۔ ان کا کہنا تھا کہ غیر ملکی افواج کے انخلا کا فیصلہ بغداد اور واشنگٹن کی مشترکہ رابطہ کمیٹی کے ذریعے طے شدہ شیڈول کے مطابق نافذ ہو رہا ہے اور اس میں توسیع کا تصور نہ سیاسی جماعتیں قبول کرتی ہیں، نہ عوام۔

عصام شاکر کے مطابق عراق اب کسی بھی خطے میں غیر ملکی لڑاکا افواج کا محتاج نہیں۔ انہوں نے کہا کہ ملکی سکیورٹی ادارے دہشت گردی کے خلاف تمام کارروائیاں سو فیصد خود انجام دے رہے ہیں، جو ان کی مکمل صلاحیت کا واضح ثبوت ہے۔ ان کے بقول غیر ملکی افواج کا انخلا ہی عراق کے مفاد میں ہے اور اس سے قومی استحکام مضبوط ہوگا۔

عراق کی پارلیمان نے جنوری 2020 میں بغداد ایئرپورٹ کے قریب امریکی حملے میں سردار قاسم سلیمانی اور ابومہدی المہندس کی شہادت کے بعد امریکی اور اتحادی افواج کے انخلا کا قانون منظور کیا تھا، جس کے بعد ان کا اخراج عراقی عوام کا متفقہ مطالبہ بن گیا۔

حالیہ ہفتوں میں بعض حلقوں نے دعویٰ کیا تھا کہ امریکی فوج کی عین الاسد بیس سے ممکنہ روانگی اصل انخلا نہیں بلکہ فریب ہے۔ عراقی تجزیہ کاروں نے بھی خبردار کیا ہے کہ واشنگٹن خطے میں نئے منظرنامے تشکیل دینے کی کوشش کر رہا ہے۔

شاکر کا کہنا تھا کہ عراق کی موجودہ سکیورٹی صورتحال مستحکم ہے اور حکومت اپنے طور پر ملک بھر میں امن برقرار رکھنے کی مکمل صلاحیت رکھتی ہے۔