امریکی فوجی اڈے عرب ممالک کے نہیں بلکہ اسرائیل کے تحفظ کے لیے ہیں:عطوان

امریکی فوجی اڈے عرب ممالک کے نہیں بلکہ اسرائیل کے تحفظ کے لیے ہیں:عطوان

معروف فلسطینی تجزیہ نگار اور روزنامہ رای الیوم کے مدیر اعلیٰ عبدالباری عطوان نے دوحہ میں منعقدہ عرب و اسلامی سربراہی اجلاس کے کمزور نتائج پر شدید تنقید کرتے ہوئے کہا ہے کہ عرب ممالک کی غیر مؤثر پالیسی صہیونیوں کو مزید جری بنا رہی ہے۔ تاہم ان کے بقول بالآخر امتِ مسلمہ نئی مزاحمتی قیادت کے ذریعے آزادی حاصل کرے گی۔

اپنے تازہ اداریے میں انہوں نے لکھا کہ اجلاس کے دوران اسرائیل نے غزہ پر بڑے پیمانے پر فوجی حملہ کیا اور یمن کے دارالحکومت صنعا کے بندرگاہ الحدیدہ کو بھی نشانہ بنایا۔ اس صورتحال میں اجلاس کا اختتامی بیان انتہائی کمزور اور غیر مؤثر رہا، جس نے صہیونی جارحیت کو روکنے کے بجائے مزید شہہ دی۔

عطوان نے کہا کہ امریکا کے اعلیٰ حکام نے نہ صرف اسرائیلی جارحیت کی حمایت کی بلکہ اس کی پیشگی منصوبہ بندی میں بھی شریک تھے۔ انہوں نے انکشاف کیا کہ قطر جو نیٹو کا اتحادی اور امریکا کا قریبی دوست ہے میزبان ہونے کے باوجود اسرائیلی حملوں سے محفوظ نہ رہا، جس سے واضح ہو گیا کہ امریکی اڈے دراصل عرب ممالک کے دفاع کے لیے نہیں بلکہ اسرائیل کے تحفظ کے لیے قائم کیے گئے ہیں۔

ان کا کہنا تھا کہ سابق امریکی صدر ڈونلڈ ٹرمپ پہلے ہی خلیجی ممالک سے کھربوں ڈالر بٹور چکے ہیں لیکن مزید رقوم کے لیے وہ نئے دفاعی معاہدوں کو اسرائیلی حملوں کے بہانے تیز کر رہے ہیں۔ عطوان کے مطابق یہ مالی بوجھ صرف فوجی اخراجات تک محدود نہیں بلکہ اربوں ڈالر کی اسلحہ ڈیلز کی صورت میں بھی عرب ممالک پر ڈالا جا رہا ہے۔

انہوں نے کہا کہ یمن کی مزاحمتی قوتیں روزانہ اسرائیل کو نشانہ بنا رہی ہیں، اور فلسطینی گروہ غزہ و مغربی کنارے میں بدترین محاصرے کے باوجود اپنی جدوجہد ترک نہیں کر رہے۔ یہی اصل جواب ہے، نہ کہ غیر مؤثر عرب اتحاد۔

عطوان نے زور دے کر کہا کہ مستقبل میں امت مسلمہ کی رہنمائی وہی نوجوان اور ایمان پر مبنی مزاحمتی قیادت کرے گی جو عوام کے دکھوں سے ابھرے گی، نہ کہ وہ حکمران جو دوحہ جیسے اجلاسوں میں محض رسمی بیانات جاری کرتے ہیں۔

انہوں نے مزید کہا کہ یمنی میزائل اور ڈرونز نے اسرائیل کے بڑے ہوائی اڈوں کو کئی بار مفلوج کیا، جبکہ غزہ کی مزاحمت گزشتہ دو برسوں سے ایک دن کے لیے بھی رکی نہیں۔ دشمن کے لیے نہ تو ان کے خفیہ ٹھکانوں تک رسائی ممکن ہوئی ہے اور نہ ہی ان کے عزم کو توڑا جا سکا ہے۔

اداریے کے اختتام پر عطوان نے کہا کہ حالات بدلنے والے ہیں اور آنے والے دن امت مسلمہ کے حق میں ہوں گے، جیسا کہ شہید سید حسن نصراللہ نے اپنے آخری خطاب میں پیشگوئی کی تھی۔