امریکہ یورپ کو گیس 4 گنا مہنگی فروخت کر رہا ہے:میکرون

?️ 24 اکتوبر 2022

سچ خبریں:فرانسیسی صدر نے امریکہ پر یورپ کو برآمد کی جانے والی گیس کی قیمتوں میں دوہرا معیار اپنانے کا الزام لگایا۔

ٹاس خبر رساں ایجنسی کی رپورٹ کے مطابق فرانسیسی صدر نے ایک تقریر میں امریکہ پر یورپی ممالک کو قدرتی گیس چار گنا زیادہ قیمتوں پر فروخت کرنے کا الزام لگایا، رپورٹ کے مطابق فرانس کے صدر ایمانوئل میکرون نے بیلجیئم کے شہر برسلز میں یورپی یونین کے سربراہی اجلاس کے بعد ایک پریس کانفرنس میں قدرتی گیس کی فروخت کے شعبے میں دوہرا معیار اپنانے پر امریکہ کو تنقید کا نشانہ بناتے ہوئے کہا کہ امریکہ اپنی گیس یورپیوں کو اپنی مقامی مارکیٹ میں گیس کی قیمت سے 3 سے 4 گنا زیادہ قیمت پر فروخت کرتا ہے۔

میکرون نے کہا کہ امریکی گیس مقامی مارکیٹ میں اس قیمت سے تین سے چار گنا سستی ہے جس پر وہ یورپیوں کو فراہم کرتے ہیں جو امریکی حکام کا دوہرا معیار ہے، ان کے بقول یہ مسئلہ بحث کا موضوع بننا چاہیے،ماکرون نے کہا کہ میں دسمبر میں اپنے دورہ امریکہ کے دوران اس مسئلے کو اٹھانے کا ارادہ رکھتا ہوں۔

واضح رہے کہ فرانس کے صدر کا یہ بیان ایسے وقت میں سامنے آیا ہے جب اس ملک میں توانائی کا بحران شدت اختیار کر چکا ہے اور لوگوں نے گزشتہ دنوں سے ہڑتالیں اور مظاہرے شروع کر دیے ہیں۔

درایں اثنا ورسک میپل کرافٹ انسٹی ٹیوٹ نے بھی اعلان کیا ہے کہ اگر یورپ کو اس موسم سرما میں گیس کی سپلائی میں غیر متوقع رکاوٹ کا سامنا کرنا پڑتا ہے تو اس سے یورپی ممالک میں اندرونی بدامنی اور عدم استحکام میں اضافہ ہونے کا امکان ہے۔