اس وقت پوری دنیا اسرائیل سے متنفر ہو چکی ہے :سابق صہیونی مٹبالر

اس وقت پوری دنیا اسرائیل سے متنفر ہو چکی ہے :سابق صہیونی مٹبالر

اسرائیل کے سابق فٹبالر اور میڈیا کی معروف شخصیت ایال بیرکوویچ نے اعتراف کیا ہے کہ عالمی سطح پر اسرائیل کے خلاف نفرت میں مسلسل اضافہ ہو رہا ہے اور حالات تل ابیب کے لیے بدتر ہوتے جا رہے ہیں۔

عبری میڈیا کے مطابق، بیرکوویچ نے ایک ریڈیو پروگرام (FM 103) میں براہِ راست گفتگو کے دوران کہا کہ دنیا کے بیشتر ممالک میں اسرائیل کے بارے میں منفی رائے پائی جاتی ہے اور یہ رجحان بالخصوص برطانیہ میں زیادہ نمایاں ہے۔ ان کے بقول، انگلستان میں مسلمانوں کی آبادی تیزی سے بڑھ رہی ہے اور اب صورتحال پر قابو پانا ممکن نہیں رہا۔ انہوں نے مزید کہا کہ بروکسل، اوسلو اور گوٹن برگ جیسے یورپی شہروں میں بھی مسلمان بڑی تعداد میں آباد ہیں اور آئندہ دس برسوں میں اسرائیلیوں کے لیے ان علاقوں کا سفر کرنا دشوار ہو جائے گا۔

اس گفتگو کے دوران اسرائیلی چینل 14 کے میزبان ایریل سیگال نے مداخلت کرتے ہوئے کہا کہ یورپ میں صرف دائیں بازو کی حکومتیں آکر ہی اس رجحان کو روک سکتی ہیں۔ ان کے مطابق، اگر یورپ میں مہاجرین کی آمد بند نہ ہوئی تو جلد ہی برطانیہ اور فرانس میں مہاجرین کے خلاف بڑی جنگ چھڑ جائے گی، اور ایسی جنگ میں اسرائیل سب سے زیادہ فائدہ اٹھائے گا۔

تاہم ایال بیرکوویچ نے اس رائے سے اختلاف کرتے ہوئے غزہ پر مکمل قبضے کی پالیسی کی مخالفت کی۔ انہوں نے کہا کہ اس طرح کے اقدامات اسرائیل کی عالمی ساکھ کو مزید خراب کر دیں گے۔

سابق کھلاڑی نے اعتراف کیا کہ ہم نے اپنی احمقانہ پالیسیوں کے ذریعے دنیا کو اپنے خلاف کھڑا کر دیا ہے، آج پوری دنیا ہم سے نفرت کرتی ہے۔ اگر اختیار میرے پاس ہوتا تو میں سب سے پہلے قیدیوں کی واپسی کے لیے مذاکرات کرتا۔