ابھی تک کوئی حتمی معاہدہ طے نہیں پایا ہے: ایران

سچ خبریں: ایرانی وزارت خارجہ کے ترجمان اسماعیل بقائی نے کہا ہے کہ معاہدے سے متعلق جو بھی باتیں سامنے آ رہی ہیں وہ محض قیاس آرائیاں ہیں اور ابھی تک کوئی حتمی معاہدہ طے نہیں پایا۔

انہوں نے واضح کیا کہ ایران اب تک کسی بھی معاہدے پر حتمی نتیجے تک نہیں پہنچا ہے۔ بقائی نے کہا کہ جب بھی ہم اس نتیجے پر پہنچیں گے کہ مفاہمت کی عبارت ایرانی قوم کے مفادات کو یقینی بنا رہی ہے، اسے عوام کے سامنے پیش کر دیا جائے گا۔

وزارت خارجہ کے ترجمان نے مزید کہا کہ مذاکرات کی صورتحال شروع سے ہی ان کے لیے واضح تھی اور عبارت کا بیشتر حصہ طے پا چکا تھا، لیکن امریکیوں نے اپنے مؤقف میں تبدیلی کی۔

انہوں نے زور دے کر کہا کہ ایران نے ثابت کر دیا ہے کہ جن معاملات کو اس نے اپنی سرخ لکیر قرار دیا ہے، ان میں کوئی نرمی نہیں کی جائے گی۔

بقائی نے یہ بھی بتایا کہ قطر اور پاکستان ثالث کی حیثیت سے فعال ہیں، تاہم امریکی اقدامات سے سفارتی عمل متاثر ہو رہا ہے۔

ان کا کہنا تھا کہ ہم کسی بھی صورت میں اپنی سرخ لکیروں سے پیچھے نہیں ہٹیں گے۔ امریکی یہ پروپیگنڈا کر رہے ہیں کہ اسلامی جمہوریہ ایران دباؤ میں آ کر معاہدے پر راضی ہو گیا ہے، جبکہ حقیقت یہ ہے کہ ہم اپنی سرخ لکیروں سے ذرا برابر بھی انحراف نہیں کریں گے۔

وزارت خارجہ کے ترجمان نے اعلان کیا کہ امریکی غیر قانونی اقدامات کی وجہ سے آبنائے ہرمز اب بھی بند ہے۔