آیت اللہ خامنہ ای نے ایرانی کرونا ویکسین کی پہلی ڈوز لے لی

?️ 25 جون 2021

سچ خبریں:ایران کے روحانی پیشو اور اسلامی انقلاب کے رہنما آیت اللہ خامنہ ای نے آج صبح ایران میں تیار کی جانے والی کرونا ویکسین کی پہلی ڈوز لے لی ہے۔
ایران کے روحانی پیشو آیت اللہ خامنہ ای کے دفتری ذرائع نے اعلان کیا ہے کہ آیت اللہ خامنہ ای نے ایرانی سائنسدانوں کی تیار کردہ ’کوو ایران برکت‘ نامی کورونا ویکسین کی پہلی ڈوز لے لی ہے، خیال رہے کہ اس سے قبل رہبر انقلاب اسلامی نے یہ اعلان کیا تھا کہ وہ دو شرطوں کے ساتھ کورونا ویکسین لگوائیں گے؛ کسی قسم کی ترجیحی بنیادوں کے بغیر باری آنے پر ہی انہیں ویکسین دی جائے اور دوسرے یہ کہ انہیں ایرانی ویکسین دی جائے۔

یادرہے کہ کچھ عرصے قبل جب ۸۰ سال سے زائد عمر کے افراد کے ویکسینیشن کا عمل شروع ہوا تو اُس وقت قائد انقلاب اسلامی نے غیر ملکی ویکسین لینے سے پرہیز کرتے ہوئے ایرانی ویکسین کی تیاری کا انتظار کیا، اب جب کہ ایران کے نوجوان سائنسدانوں نے ’کوو ایران برکت‘ نامی ویکسین تیار کر لی ہے اور اسے وزارت صحت کی تائید حاصل ہو چکی ہےتو قائد انقلاب اسلامی نے مذکورہ ویکسین کی پہلی ڈوز لے لی ہے۔

اس موقع پر ایران کے وزیر صحت ڈاکٹر سعید نمکی اور امام خمینی سے موسوم فلاحی و تحقیقاتی ادارے (Executive Headquarters of Imam’s Directive) کے سربراہ محمد مخبر بھی موجود تھے، ’کوو ایران برکت‘ نامی کورونا ویکسین مذکورہ ادارے سے وابستہ ’برکت‘ فاؤنڈیشن نے تیار کی ہے جسکی پہلی ٹرائل ڈوز کو محمد مخبر نے اپنی بیٹی پر آزمایا تھا۔