مہنگائی کے مختلف اسباب ہیں کچھ تو ہمارے کنٹرول سے باہر ہیں، شبلی فراز

?️ 8 مارچ 2021

اسلام آباد( سچ خبریں) وفاقی حکومت کے وزیر اطلاعات و نشریات سینیٹر شبلی فراز نے ملک میں مہنگائی کی مختلف وجوہات کو ذمہ دار ٹھراتے ہوئے اپنا بلو جھاڑ لیا اور کہا کہ بعض وجوہات تو ایسی ہیں جو حکومت کے کنٹرول سے باہر ہے۔ 

اسلام آباد میں میڈیا بریفنگ کے دوران وفاقی وزیر اطلاعات و نشریات سینیٹر شبلی فراز نے کہا کہ قومی اسمبلی میں اعتماد کا ووٹ ملنے کے بعد وزیر اعظم عمران خان نے مہنگائی کے خلاف جہاد کا اعلان کردیا ہے جس کے تحت متوسط اور غریب طبقے کو ٹارگٹڈ سبسڈی دیں گے،ملک میں معاشی ترقی کے ثمرات عوام تک پہنچیں گے۔ان کا کہنا تھاکہ بعض چیزیں بر آمد کی جاتیں ہیں اس کے باوجود ٹارگٹڈ سبسڈی دیں گے تاکہ صاحب ثروت کے بجائے مستحق افراد کو فائدہ پہنچے۔شبلی فراز نے کہا کہ مہنگائی کو کنٹرول میں رکھنے کے لیے 3 ماہ قبل کام شروع ہوا تھا بہت جلد اس کے ثمرات دیکھیں گے۔

انہوں نے مزید کہا کہ تحریک انصاف جن قوتوں کے خلاف کرپشن کے خاتمے کے لیے جنگ میں مصروف ہے اس کی نمائندگی پی ڈی ایم کررہی ہے،یہ وہ قوتیں ہیں جنہوں نے اس ملک کی اخلاقیات کو تباہ و برباد کیا۔انہوں نے کہا کہ وزیر اعظم کو اعتماد کا ووٹ ملنے سے پورے ملک میں خوشی کی لہر دوڑ گئی۔وزیراطلاعات کے بقول اپوزیشن جماعتوں نے سیاست کو کاروبار کے فروغ کے لیے استعمال کیا اس طرح عوام کی حالت بہتر نہیں ہوئی بلکہ اپوزیشن رہنماؤں کی جایدادوں میں اربوں روپے اضافہ ہوا۔شبلی فراز نے سوال اٹھایا کہ کیا وجہ ہے ن لیگ اور پیپلز پارٹی محض ایک صوبے تک محدود ہوگئی ہے جبکہ ماضی میں اس کی نمائندگی چاروں صوبوں میں تھی۔وفاقی وزیر نے مزیدکہا کہ اب اپوزیشن جماعتوں کا ضمیر نہیں رہا جس کی ایک حالیہ مثال یوسف رضا گیلانی کے بیٹے کی وڈیو منظر عام پر آنے سے ملتی ہے۔