نادیہ خان بیٹی کا ذکر کرتے ہوئے کیوں جذباتی ہوگئیں؟

?️ 27 جون 2021

کراچی (سچ خبریں)پاکستان شوبز انڈسٹری کی مقبول ترین میزبان و اداکارہ نادیہ خان اپنی بیٹی علیزے سے متعلق گفتگو کرتے ہوئے اپنے جذبات پر قابو نہ رکھ سکیں ، ان کا کہنا تھا کہ میں اسلام فوبیا اور کورونا وائرس کی وجہ سے دُنیا کی موجودہ صورتحال دیکھ کر بہت پریشان ہوں اور اسی وجہ سے علیزے کو اپنے پاس رکھنا چاہتی ہوں۔

سرکاری ٹی وی چینل کے پروگرام میں میزبانی کے فرائض سرانجام دینے والی نادیہ خان نے حال ہی میں اپنے شو میں اپنی بیٹی علیزے کو بطورِ مہمان مدعو کیا۔نادیہ خان نے اپنے شو کے دوران بیٹی کے بارے میں گفتگو کرتے ہوئے کہا کہ ’میری بیٹی علیزے بہت جلد اعلیٰ تعلیم کے لیے کینیڈا چلی جائے گی۔

میزبان نے کہا کہ ’میں چاہتی ہوں کہ میری بیٹی یہاں پاکستان میں ہی رہ کر اپنی تعلیم مکمل کرے اور میں نے علیزے کو روکنے کی بہت کوشش بھی کی لیکن میں کامیاب نہیں ہوسکی۔اُنہوں نے کہا کہ ’میں اسلام فوبیا اور کورونا وائرس کی وجہ سے دُنیا کی موجودہ صورتحال دیکھ کر بہت پریشان ہوں اور اسی وجہ سے علیزے کو اپنے پاس رکھنا چاہتی ہوں۔

نادیہ خان دورانِ شو بیٹی کے کینیڈا جانے کے حوالے سے گفتگو کرتے ہوئے خود پر قابو نہ رکھ سکیں اور آبدیدہ ہوگئیں۔میزبان نے مزید کہا کہ ’میں نے علیزے کو اداکاری کی دُنیا میں آنے کا بھی کہا تھا اور اس ضمن میں بہت سے لوگوں سے بیٹی کی ملاقات بھی کروائی لیکن اچھے گریڈز کی وجہ سے علیزے کا یونیورسٹی میں داخلہ کروادیا۔‘

واضح رہے کہ رواں سال کی شروعات میں ہی نادیہ خان ریٹائرڈ پی اے ایف آفیسر اور فائٹر پائلٹ فیصل ممتاز راؤ کے ساتھ رشتۂ ازدواج میں منسلک ہوئی ہیں۔نادیہ خان کے شوہر پاک فضائیہ میں 18 سال تک خدمات انجام دینے کے بعد 2009 میں ونگ کمانڈر کی حیثیت سے ریٹائر ہوئے اور متحدہ عرب امارات کی فضائیہ میں پہلے انسٹرکٹر پائلٹ اور پھر چیف آف سیفٹی کی حیثیت سے شامل ہوئے۔نادیہ خان اس سے قبل بھی شادی کے بندھن میں بندھ چکی ہیں اور اُن کے تین بچے ہیں، اُن کی بڑ ی بیٹی کا نام علیزے، بیٹے کا نام اذان اور سب سے چھوٹے بیٹےکا نام کیان ہے۔