یوم آزادی؛ پنجاب بھر کے شہروں کو دلہن کی طرح سجا دیا گیا، ہورڈنگز اور بڑی سکرینز آویزاں، بچوں کی خصوصی دلچسپی

?️ 6 اگست 2025

لاہور (سچ خبریں) وزیراعلی پنجاب مریم نواز کی ہدایت پر اُناسیویں (79) یوم آزادی کے سلسلے میں پنجاب بھر میں شہروں کو دلہن کی طرح سجا دیا گیا۔

تفصیلات کے مطابق اس بار اُناسیویں یوم آزادی کو ’’حصول آزادی سے تحفظ آزادی“ کا عنوان دیا گیا ہے۔ بہاولپور، راجن پور، گجرات، لیہ، گوجرانوالہ، جہلم، راولپنڈی، اٹک سمیت مختلف شہروں کو سجانے کا سلسلہ جاری ہے۔ راولپنڈی کے صدر، سیٹلائٹ ٹاؤن، فیض آباد، چاندنی چوک، راجہ بازار، فوارہ چوک، چیئرنگ کراس اور مری کے مال روڈکو سبز ہلالی پرچموں سے سجادیا گیا۔ گوالمنڈی، موتی بازار، لیاقت روڈ، چکلالہ، سکستھ روڈ، سوینتھ روڈ سمیت دیگر شاہراہوں پر بھی قومی پرچم لہرا دئیے گئے۔ مری روڈ کے دونوں اطراف قومی پرچم، بینر اور آرائشی جھنڈیاں آویزاں کردی گئیں۔

ذرائع کے مطابق یوم آزادی کے سلسلے میں مختلف مختلف شاہراہوں اور چوک چوراہوں پر مشتمل ہورڈنگز اور بڑی بڑی سکرینز بھی آویزاں کی گئی ہیں۔ شہروں کی شاہراہوں پر قومی پرچموں کی بہار میں بچے خصوصی دلچسپی لے رہے ہیں اورگھروں پر قومی پرچم لہرانے، گاڑیوں پر پرچم اور سٹیکر لگانے کا سلسلہ بھی جاری ہے۔ نوجوانوں اور عام شہریوں نے موٹر سائیکلوں کو بھی قومی پرچم سے سجا لیا۔ سرکاری اور نجی عمارتوں پر چراغاں بھی کردیا گیا، چوراہوں کو برقی قمقوں سے سجا دیا گیا۔

وزیراعلی مریم نواز کی ہدایت پر ہسپتالوں، اولڈ ایج ہومز اور دیگر عمارتوں پر بھی خوبصورت انداز میں چراغاں کیاگیا۔ بڑے شہروں کو جوڑنے والی شاہراہوں پر بھی سکرینز، ہورڈنگز اور قومی پرچم لگائے گئے ہیں۔ جشن آزادی کے سلسلے میں پنجاب بھر میں انتظامیہ اور شہری تنظیمیں بھی متحرک ہیں۔ سکولوں، کالجوں اور یونیورسٹیوں میں یوم آزادی کے سلسلے میں مختلف رنگا رنگ تقاریب کا سلسلہ بھی جاری ہے۔