گورنر سندھ کی اپوزیشن پر کڑی تنقید

?️ 14 نومبر 2021

کراچی (سچ خبریں) گورنر سندھ عمران اسماعیل نے اپوزیشن پر تنقید کرتے ہوئے کہا ہے کہ آئندہ سال بھی ہمیں برداشت کرنے کی عادت ڈال لیں، پی ڈی ایم والے اقتدار کیلئے بھاگ رہے ہیں ان کو عوام سے کوئی دلچسپی نہیں۔ انہوں نے کہاکہ مولانا کو اب اقتدار سے الگ رہنے کی عادت ڈال لینی چاہیے۔

ان خیالات کا اظہار پی ٹی آئی رہنما و گورنر سندھ عمران اسماعیل نے میڈیا سے گفتگو کرتے ہوئے کیا، انہوں نے پی ڈی ایم پر تنقید کے نشتر برستاے ہوئے کہا کہ پی ڈی ایم میں دراڑیں پڑچکی ہیں، جس کا ثبوت کبھی پیپلز پارٹی کی ناراضگی ہے تو کبھی مولانا خود ناراض ہوجاتے ہیں۔

عمران اسماعیل نے کہا کہ پی ڈی ایم کی صورتحال کھسیانی بلی کھمبا نوچے والی بات ہوگئی ہے، ان کو کوئی ٹیکہ لگتا ہے تو پھر آجاتے ہیں حالانکہ پی ڈی ایم والے اقتدار کےلیے بھاگ رہے ہیں ان کو عوام سے کوئی دلچسپی نہیں ہے۔

گورنر سندھ کا کہنا تھا کہ یہ چاہتے ہیں کہ کیسز معاف کرکے انہیں اقتدار میں شامل کرلیا جائے لیکن انہیں بتانا چاہتا ہوں کہ آئندہ سال بھی ہمیں برداشت کرنے کی عادت ڈال لیں۔

انہوں نے گرین لائن سے متعلق کہا کہ گرین لائن کی کوئی حتمی تاریخ نہیں دے سکتا لیکن جلد گرین لائن اسٹارٹ کریں گے، منصوبہ حتمی مراحل میں ہے اور گرین بسوں کی ٹیسٹنگ بھی کی جارہی ہے۔انہوں نے کہا کہ مولانا اور ان کی سیاست اب دفن ہوگئی، مولانا کو اب اقتدار سے الگ رہنے کی عادت ڈال لینی چاہیے۔