کراچی: اومی کرون وائرس کے مشتبہ کیسز سے متعلق وزیر صحت کا اہم بیان

9 دسمبر 2021

کراچی (سچ خبریں) کراچی میں اومی کرون وائرس کے مشتبہ کیسز سے متعلق وزیر صحت سندھ ڈاکٹر عذرا پیچوہو نے اپنے بیان میں کہا ہے کہ ویکسی نیشن اور بوسٹر ڈوزبچاوٴ کا واحد طریقہ ہے، کیسز کی جینومک اسٹڈی کے نتائج آنے میں 2 ہفتے کاوقت لگ سکتا ہے۔

تفصیلات کے مطابق وزیر صحت سندھ ڈاکٹر عذرا پیچوہو نے اومی کرون ویرینٹ کے معاملے پر اپنے ویڈیو بیان میں کہا ہے کہ اومی کرون وائرس کے مشتبہ کیس کی جینومک اسٹڈی جاری ہے، جینومک اسٹڈی کے نتائج آنے میں 2 ہفتے کاوقت لگ سکتا ہے۔

عذراپیچوہو نے بتایا کہ مریضہ میں علامات سے لگ رہا ہے وائرس اومی کرون ہے، اومی کرون وائرس تیزی سے پھیلتا ہے تاہم اموات کاتناسب کم ہے، جنوبی افریقہ سے رپورٹس کےمطابق اومی کرون سے زیادہ اموات رپورٹ نہیں۔وزیر صحت سندھ کا کہنا تھا کہ وائرس کی کسی بھی قسم سے بچنے کا بہترین حل ویکسین ہے ویکسین نہ کرانے کی وجہ سے وائرس تیزی سے پھیلتا ہے، مشتبہ مریضہ ویکسین شدہ نہیں۔

انھوں نے مزید کہا کہ جن لوگوں نے ویکسین نہیں لگائی ہے وہ فوری طور پر ویکسین لگوائیں ، پہلی ڈوز کے حامل افراد فوری طور پر دوسری ڈوز لگوائیں اور یسے افراد جو دونوں ڈوز مکمل کرچکے ہیں وہ فوری طور پر بوسٹر ڈوز لگوائیں۔عذراپیچوہو کا کہنا تھا کہ ویکسی نیشن اور بوسٹر ڈوزبچاوٴ کا واحد طریقہ ہے، بیماری بہر حال بیماری ہوتی ہے ہلکی ہو یا مہلک۔