اسلام آباد(سچ خبریں) وزیر ریوینیو پنجاب ملک محمد انور نے کہا ہے کہ حکومت افرادی قوت کی کمی کے پیش نظر بورڈ آف ریونیو میں 5 ہزار پٹواریوں کو بھرتی کررہی ہے۔انہوں نے یہ بات ضلع اٹک کے علاقے پنڈی گھیپ میں تعیناتیوں کے لیٹرز کی تقسیم کے لیے منعقدہ تقریب میں کہی۔
صوبائی وزیر نے پنڈی گھیپ سے تعلق رکھنے والے 7 جبکہ فتح جنگ کے 3 پٹواریوں میں اپائنٹمنٹ لیٹرز تقسیم کیے جن میں ایک خاتون بھی شامل ہیں۔
ملک محمد انور کا کہنا تھا کہ تعیناتیوں کے پہلےمرحلے میں صوبے کے مختلف حصوں میں ساڑھے 3 ہزار پٹواریوں کا تقرر کیا گیا جبکہ بقیہ تعیناتیاں آئندہ ایک سال کے دوران مرحلہ وار کی جائیں گی۔
انہوں نے کہا کہ پنجاب لینڈ ریکارڈ اتھارٹی (پی ایل آر اے) نے لینڈ ریکارڈ سے متعلق خدمات کی فراہمی بہتر بنانے اور شہریوں کی سہولت کے لیے اراضی ریکارڈ سینٹرز قائم کر کے لینڈ ریکارڈ کی خدمات کو توسیع دی ہے اور ان نئے عہدیداروں کو ان مراکز میں تعینات کیا جائے گا۔
ان کا کہنا تھا کہ پٹواریوں کا عہدہ محکمہ ریونیو کی درجہ بندی کے لیے ضروری ہے۔انور ملک کا مزید کہنا تھا کہ محکمہ خزانہ کی بہتری کے لیے انقلابی اور جدید اقدامات کرنے کی کوشش کی جا رہی ہے جس کی وجہ سے ریوینیو کی پیداوار میں ریکارڈ اضافہ ہوا ہے۔
بعدازاں صحافیوں سے بات کرتے ہوئے صوبائی وزیر کا کہنا تھا کہ فتح جنگ تا پنڈی گھیپ روڈ کی تعمیر کے لیے ٹینڈر کا اجرا آئندہ ماہ کیا جائے گا اور سڑک کے دونوں اطراف ایک ساتھ کام شروع کیا جائے گا۔
انہوں نے کہا کہ حکومت تحصیل ہیڈ کوارٹر ہسپتال پنڈی گھیب میں ماہر ڈاکٹروں کی تعیناتی کو یقینی بنانے کی ہر ممکن کوشش کر رہی ہے تاکہ لوگوں کو ان کی دہلیز پر بہتر طبی سہولیات فراہم کی جا سکیں۔
