وزیر خارجہ کی ترکمانستان کے صدر سے ملاقات، دوطرفہ تعلقات پر زور

26 اگست 2021

اشک آباد(سچ خبریں) وزیر خارجہ شاہ محمود قریشی ترکمانستان پہنچے جہاں انہوں نے  ترکمانستان کے صدرقربان قلی بردی محمدوف سے ملاقات میں کہا کہ پاکستان ترکمانستان کیساتھ اقتصادی روابط کے فروغ کیلئےپرعزم ہے، دونوں رہنماؤں نے دوطرفہ تعلقات اور اقتصادی روابط کو فروغ دینے پر تبادلۂ خیال کیا۔

تفصیلات کے مطابق وزیرخارجہ شاہ محمود قریشی 4 ملکی دورے کے تیسرے مرحلے میں ترکمانستان پہنچے، جہاں پاکستانی سفیر اور ترکمانستانی وزارت خارجہ کے حکام  نے ان کا خیرمقدم کیا۔وزیر خارجہ شاہ محمود قریشی کی ترکمانستان صدرقربان قلی بردی محمدوف سے ملاقات ہوئی ، وزارت خارجہ ترکمانستان کے سینئر حکام بھی ملاقات میں موجود تھے۔

وزیرخارجہ نے ترکمانستان صدر کو وزیراعظم عمران خان کا نیک خواہشات کا پیغام دیا۔ملاقات میں شاہ محمودقریشی کا کہنا تھا کہ پاکستان،ترکمانستان سے تعلقات کو اہمیت دیتا ہے، پاکستان ترکمانستان کیساتھ اقتصادی روابط کے فروغ کیلئے پرعزم  ہے۔

وزیرخارجہ نے افغانستان کی موجودہ صورتحال کے حوالے گفتگو کرتے ہوئے ترکمانستان کے صدر کوافغانستان صورتحال پرپاکستانی نقطہ نظر سے آگاہ کیا اور کہا پر امن اور مستحکم افغانستان خطےمیں منفعت کاباعث ہوگا۔ اس موقع پر ترکمانستان صدر نے وزیر خارجہ کو ترکمانستان آمد پر خوش آمدید کہتے ہوئے کہا افغان صورتحال کے پیش نظر وزیر خارجہ کی کاوشوں کو سراہا۔