پہلی بار حکومت عوامی مسائل کو حل کر رہی ہے: فرخ حبیب

?️ 26 اگست 2021

اسلام آباد (سچ خبریں) وزیر مملکت اطلاعات و نشریات فرخ حبیب نے پی ٹی آئی کے 3 سال مکمل ہونے پرگفتگو کرتے ہوئے کہاکہ یہ ملکی تاریخ میں  پہلی بار ہو رہا ہے کہ  حکومت عوام کے پاس جا کر ان کے مسائل حل کر رہی ہے۔پی ٹی آئی حکومت مختلف شعبوں میں عوام کو سہولیات میسر کرنے پر کام کر رہی ہے۔

فرخ حبیب نے اپنے بیان میں کہاکہ حکومت کو کئی چیلنجز کا سامنا تھا،معیشت بہتر کرنے اور غریب و متوسط طبقے کو اوپر اٹھانے کیلئے متعدد اقدامات کیے۔وزیر مملکت نے بتایا کہ پی ٹی آئی حکومت پانی کے ذخائر اور ڈیمز بنانے پر کام کر رہی ہے، ماحولیات سےمتعلق بھی دنیا نے ہمارے اقدامات کو سراہا ہے۔فرخ حبیب نے کہا کہ صحت کیلئےبھی حکومت نے عوام کو سہولیات دیں۔

دوسری جانب وفاقی وزیر اطلاعات فواد چوہدری کا کہنا ہے کہ تحریک انصاف فخر کے ساتھ اپنی کارکردگی عوام کے سامنے رکھ سکتی ہے، جبکہ 30 سال حکومت کرنے والے اپنا منہ چھپا رہے ہیں۔سماجی رابطے کی ویب سائٹ ٹوئٹر پر اپنے بیان میں وفاقی وزیر فواد چوہدری نے سوال اٹھایا کہ پاکستان میں کتنی حکومتیں اپنی کارکردگی پر عوام کو جواب دہی کرتی رہیں۔

انہوں نے کہاکہ یہ عمران خان کی حکومت ہے جو 3 سالہ کارکردگی عوام کے سامنے فخر کےساتھ رکھ سکتی ہے۔وفاقی وزیر کا مزید کہنا تھا کہ وہ معیشت، خارجہ پالیسی اور اندرونی استحکام کے 3 سال حقائق کے ساتھ سامنے لائیں گے۔