نوشکی(سچ خبریں)وزیر اعظم عمران خان نے نوشکی میں تعینات فوجی جوانوں سے خطاب کرتے ہوئے کہا کہ پوری قوم پاک فوج کے جوانوں کے ساتھ کھڑی ہے، دہشت گردی کو ناکام بنانے پر جوانوں کو خراج تحسین پیش کرتا ہوں، ایف سی اور رینجرز جوانوں کی تنخواہوں میں 15 فیصد اضافے کیا جائے گا۔
تفصیلات کے مطابق وزیر اعظم عمران خان نے نوشکی میں تعینات فوجی جوانوں سے خطاب کرتے ہوئے کہا کہ دہشت گردی کو ناکام بنانے پر جوانوں کو خراج تحسین پیش کرتا ہوں، پاکستان کی فوج کے جوانوں کو پیغام دینا چاہتا ہوں، پوری قوم پاک فوج کے جوانوں کے ساتھ کھڑی ہے۔
وزیر اعظم کا کہنا تھا کہ ہماری فوج نے مشکل حالات میں دہشت گردی کے خلاف جنگ لڑی، فوج نے لوگوں کو دہشت گردی سے محفوظ کیا۔ قوم کو اعتماد ہے کہ کسی قسم کی دہشت گردی پاکستان میں کامیاب نہیں ہوسکتی۔وزیر اعظم نے ایف سی اور رینجرز جوانوں کی تنخواہوں میں 15 فیصد اضافے کا اعلان کرتے ہوئے کہا کہ مہنگائی کا دور ہے اس کا پورا علم ہے، بدقسمتی سے پوری دنیا میں مہنگائی کا سیلاب ہے۔ امریکا، برطانیہ میں بھی مہنگائی کی 40 سالہ ریکارڈ لہر آئی ہے۔
انہوں نے کہا کہ پوری کوشش ہے کہ ہم اپنے لوگوں کی آمدن میں اضافہ کریں، جیسے جیسے آمدن بڑھے گی ہم تنخواہ دار طبقے کی آمدن بھی بڑھاتے جائیں گے۔وزیر اعظم کا کہنا تھا کہ بلوچستان پر خاص توجہ دے رہے ہیں کیوںکہ یہ پیچھے رہ گیا، دہشت گرد حملے کی جب خبر ملی تو میں اس وقت چین میں تھا۔ اسی وقت فیصلہ کیا کہ واپس آکر نوشکی جاؤں گا۔انہوں نے کہا کہ ہم جانتے ہیں کہ پیچھے سے بھی فنڈنگ ہوتی ہے جو چاہتے ہیں پاکستان کے ٹکڑے ہوں، سی پیک کے اگلے مرحلے میں سب سے زیادہ بلوچستان کو فائدہ ہوگا۔
