20 ملین ٹن غلہ برآمد کے لیے تیار ہے:یوکرین

?️ 23 جولائی 2022

سچ خبریں:روس اور یوکرین کے درمیان اناج اور زرعی مصنوعات کی محفوظ برآمدات دوبارہ شروع کرنے کے حالیہ معاہدے کے بعد، یوکرین کے صدر نے کہا کہ ان کے ملک کے گوداموں میں 10 بلین ڈالر مالیت کا اناج موجود ہے جسے نئے معاہدے کے تحت برآمد کیا جائے گا۔
روئٹرز خبر رساں ادارے کی رپورٹ کے مطابق یوکرین کے صدر ولادیمیر زیلینسکی کا کہنا ہے کہ اناج کی برآمدات کے حالیہ معاہدے کے بعد یوکرین اس سال کی فصل کے علاوہ 10 بلین ڈالر مالیت کا ذخیرہ شدہ اناج بھی برآمد کر سکے گا۔

واضح رہے کہ روس اور یوکرین نے بالآخر جمعہ کے روز اقوام متحدہ اور ترک حکومت کے نمائندے کی ثالثی سے یوکرین اور بحیرہ اسود کی بندرگاہوں سے اناج کی برآمد دوبارہ شروع کرنے پر اتفاق کیا، یہ ایک ایسا معاہدہ ہے جس نے خوراک کے بین الاقوامی بحران کو کم کرنے کی امیدیں بڑھا دی ہیں۔

زیلنسکی نے اپنے بیان میں اس معاہدے کو ایک فتح اور یوکرین کی جنگ لڑنے کی صلاحیت کی ایک اور نشانی قرار دیا، یوکرین کے لیے اس معاہدے کی اہمیت کے بارے میں انھوں نے مزید کہا کہ گزشتہ سال سے اب تک تقریباً 20 ملین ٹن اناج کو ذخیرہ کیا جا چکا ہے اور اسے برآمد کیا جا سکتا ہے، اس کے علاوہ اس سال کی مصنوعات بھی برآمد کی جا سکتی ہیں۔