وزیر اعظم آج پاکستان کے سب سے بڑے ہیلتھ ریفارمز کا افتتاح کریں گے

🗓️ 26 مئی 2021

اسلام آباد(سچ خبریں) وزیر اعظم کے معاون خصوصی شہباز گل نے سماجی رابطے کی ویب سائٹ ٹوئٹر پر بتایا ہے کہ وزیر اعظم آج لیہ میں پاکستان کے سب سے بڑے ہیلتھ ریفارمز کا آغاز کریں گے جس کے تحت ڈی جی خان اور ساہیوال ڈویژن کے 100 فیصد آبادی کو ہیلتھ کارڈز کا اجرا ہونے جا رہا ہے.

انہوں نے کہا کہ وزیر اعظم نیا پنجاب بیسک ہیلتھ یونٹس سولرائزیشن پروگرام کا افتتاح اور 200 بیڈز کے مدر اینڈ چائلڈ ہسپتال کا سنگ بنیاد بھی رکھیں گے شہباز گل کا کہنا تھا کہ وزیر اعظم عمران خان لیہ کے لیے آج 7 ارب روپے کے منصوبے کا اعلان کریں گے اور یہ ہیلتھ کارڈ دنیا کی تاریخ کا پہلا منصوبہ ہے جو غریب ملک میں دیا جا رہا ہے. انہوں نے کہا کہ اب ہم ایسا ہسپتال بنا رہے ہیں جس میں نواز شریف سمیت سب کاعلاج ہو گا ایک ڈوبی ہوئی معیشت کو عمران خان کی حکومت نے سہارا دیا.

اس سے قبل معاون خصوصی کا کہنا تھا کہ مسلم لیگ( ن) نے لیہ میں کھوکھلے وعدے اور دعوے کیے عوام کو لوٹنے والے رات کے اندھیرے میں بھاگتے ہیں اور جنوبی پنجاب کے شہریوں کو ماضی میں صرف خواب دکھائے گئے تاہم موجودہ دور میں صرف اعلان نہیں عملی اقدامات ہوں گے. ان کا کہنا تھا کہ مسلم لیگ ن دورمیں لیہ میں 1.7 ارب کے فنڈز ، پی پی دور میں بھی 1.6 ارب روپے کے فنڈز کے اعلانات ہوئے تاہم ماضی میں فنڈز کے اعلان کے باوجود لیہ میں کام نہیں ہوئے.