اسلام آباد: (سچ خبریں) سابق وزیراعظم اور پارٹی قائد نواز شریف نے وطن واپسی سے متعلق قانونی ٹیم سے مشاورت مکمل کر لی ہے۔نجی ٹی وی کی رپورٹ کے مطابق وطن واپسی اور پارٹی کی تنظیم نو کا معاملہ، سابق وزیراعظم نوازشریف کی قانونی ٹیم سے مشاورت مکمل ہو گئی۔نوازشریف کا واپسی سے قبل اپنی نااہلی،سزاؤں اور کیسز کے حوالے سے عدالت سے رجوع کیے جانے کا امکان ہے۔
نوازشریف کی ہدایت ملنے کے بعد وکلا کی ٹیم جلد عدالت میں درخواست دائر کرے گی۔عدالت سے نوازشریف کی ضمانت قبل از گرفتاری کے لیے بھی رجوع کیا جائے گا۔پنجاب میں مایوس کن کارگردگی پر نوازشریف اہم رہنماؤں سے بھی ناراض ہیں۔وطن واپسی پر نوازشریف چاروں صوبوں کا دورہ کریں گے، اس دوران مریم نواز بھی ان کے ہمراہ ہوں گی۔
پارٹی کو سیاسی میدان میں مزید متحرک کیا جائے گا۔
قبل ازیں یہ بھی بتایا گیا کہ پاکستان تحریک انصاف نے سابق وزیراعظم نواز شریف کو قانونی محاذ پر ٹف ٹائم دینے کا فیصلہ کر لیا۔ نواز شریف کی ممکنہ وطن واپسی کے پیش نظر پی ٹی آئی نے قانونی محاذ پر بھرپور جنگ لڑنے کا فیصلہ کر لیا ہے۔پی ٹی آئی کی لیگل ٹیم چئیرمین پی ٹی آئی عمران خان کو نوازشریف کے خلاف کیسز پر بریفنگ دے گی۔ لیگل ٹیم کی جانب سے بتایا جائے گا کہ سابق وزیراعظم نوازشریف کے خلاف مقدمات کس مرحلے میں ہیں اور نوازشریف کے خلاف کون کون سے کرپشن کے کیسز ہیں۔
یہاں واضح رہے کہ عمران خان نے 13 اگست کی شب ہونے والے جلسے میں بھی نوازشریف کی واپسی کا ذکر کیا تھا۔انہوں نے کہا تھا کہ یہ ستمبر میں بھگو ڑے نواز شریف کو واپس لانا چاہتے ہیں، اچھی طرح استقبال کروں گا۔نیشنل ہاکی اسٹیڈیم لاہور میں جشن آزادی کی مناسبت سے جلسے سے خطاب کرتے ہوئے عمران خان نے کہا کہ سکندر سلطان بزدل آدمی ہے ،اس کو پیچھے سے بوٹ پڑا جوتا پڑا اس نے پوری مدد کی ۔ انہوں نے کہا کہ اس کے بعد ایک نیا پلان بنایا ،عمران خان کے خلاف کیسز کرو ،الیکشن کمیشن میں ریفرنس بنائو ،توشہ خانہ کا کیس فنڈنگ کا کیس کرو تاکہ اسے کسی طرح نا اہل کرو ۔
