نسلہ ٹاور گرانے کے عدالتی حکم پر انتظامیہ کی پھرتیاں

26 اکتوبر 2021

کراچی (سچ خبریں) نسلہ ٹاور کو گرانے کے عدالتی حکم پر انتظامیہ کی پھرتیاں جارہی ہیں، اس حوالے سے  اسسٹنٹ کمشنر فیروزآباد نے عدالتی حکم پر عملدرآمد کرانے کیلئے نسلہ ٹاور کو فراہم کی جانے والی تمام یوٹیلیٹی سہولیات فوری منقطع کرنے کیلئے متعلقہ اداروں کومراسلہ جاری کردیا۔

تفصیلات کے مطابق نسلہ ٹاور کو ایک ہفتے میں گرانے کے عدالتی حکم پر انتظامیہ کی پھرتیاں جاری ہیں، عدالتی حکم پر عملدرآمد کرانے اسسٹنٹ کمشنر فیروزآباد کا کہنا ہے کہ نسلہ ٹاور کو فراہم کی جانے والی تمام یوٹیلیٹی سہولیات فوری منقطع کی جائیں۔

اس سلسلے میں اسسٹنٹ کمشنر فیروزآباد نے ایم ڈی واٹر بورڈ ، سی ای او کے الیکٹرک ، ایم ڈی سوئی سدرن گیس حکام کو مراسلہ ارسال کردیا ہے۔مراسلے میں کہا گیا ہے کہ ستائیس اکتوبر تک نسلہ ٹاور کو فراہم کی جانے والی بجلی ، گیس اور پانی کی فراہمی کو بند کردیا جائے،کنیکشن منقطع کرنے کے بعد ہی نسلہ ٹاور کو گرانے اور مزید اگے کی کارروائی ممکن ہوسکے گی۔

واضح رہے کہ گذشتہ روز سپریم کورٹ نےنسلہ ٹاور ایک ہفتے کے اندر اندر گرانے کا حکم دیتے ہوئے کمشنر کراچی کو ملبہ اٹھانے کا کام شروع کرنے کی ہدایت کی تھی اور کہا تھا کہ کسی قسم کی کوئی رعایت نہیں۔