فلسطینی عوام آزادی مشن میں کامیاب ہوں گے:گورنرپنجاب

?️ 18 مئی 2021

لاہور (سچ خبریں)فلسطین کے خلاف اسرائیلی جارحیت مسلسل جاری ہے گورنر پنجاب چوہدری محمد سرور نے آج فلسطین کے خلاف اسرائیلی جارحیت کے معاملے پر گورنر ہاؤس میں یکجہتی فلسطین کانفرنس کرنے کا اعلان کیا ہے اس موقع پر ان کا کہنا تھا کہ فلسطینی عوام آزادی کے مشن میں کامیاب ہوں گے۔

کانفرنس میں سیاسی و مذہبی جماعتوں اور مختلف تنظیموں کے نمائندے شریک ہوں گے جبکہ کانفرنس کے اختتام پر مشترکہ اعلامیہ بھی جاری کیا جائے گا۔اس کے علاوہ کانفرنس میں اسرائیل کی دہشتگردی کے خلاف مذمتی قرارداد بھی منظور کی جائے گی۔

اس موقع پر چوہدری محمد سرور نے کہا کہ مسئلہ فلسطین پر 22 کروڑ پاکستانی ایک ہیں، اسرائیل فلسطین میں دہشت گردی سے خون کی ہولی کھیل رہا ہے۔چوہدری محمد سرور نے کہا کہ پاکستان اقوام متحدہ میں فلسطینیوں کا بھرپور مقدمہ لڑے گا۔

اُنہوں نے کہا کہ اسرائیل میزائل کی طاقت سے فلسطینیوں کی آواز نہیں دبا سکتا۔گورنر پنجاب نے اُمید ظاہر کرتے ہوئے کہا کہ انشاءاللّہ فلسطینی عوام آزادی کے مشن میں کامیاب ہوں گے۔

دوسر ی جانب وزیرخارجہ شاہ محمود قریشی اہم سفارتی مشن پر ترکی پہنچ گئے ہیں جہاں وہ  فلسطینی وزیر خارجہ کا ترکی میں انتظار کررہے ہیں۔وزیر خارجہ کا کہنا ہے کہ فلسطینی وزیر خارجہ کی ترکی روانگی میں رکاوٹیں ڈالی جارہی ہیں۔شاہ محمود قریشی نے جیونیوز سے گفتگو میں بتایا کہ اقوام متحدہ کی جنرل اسمبلی کا 20 تاریخ کو ہنگامی اجلاس ہورہا ہے، میرے ساتھ ترکی اور فلسطین کے وزیر خارجہ نیویارک روانہ ہوں گے۔

انہوں نے کہا کہ فلسطینی وزیر خارجہ کی روانگی میں رکاوٹیں ڈالی جارہی ہیں، ہماری روانگی میں تاخیر ہورہی ہے، ہم آج نہیں کل روانہ ہوں گے۔شاہ محمود قریشی کا کہنا ہے کہ وزیراعظم نے 21 تاریخ کو فلسطین سے اظہار یکجہتی کی کال دی ہے، مسئلہ کشمیر اور فلسطین سے ہم آنکھ نہیں چرا سکتے۔