فردوس نقوی نےاسمبلی رکنیت سے مستعفی ہونے کا اعلان کر دیا

29 جون 2021

کراچی(سچ خبریں) پی ٹی آئی رہنما فردوس شمیم نقوی نے اپنی اسمبلی رکنیت سے استعفیٰ دینے کا اعلان کر دیا۔انہوں نے اسمبلی رکنیت سے استعفی دینے کے حوالے سے کہا ہے  کہ میں احتجاجاً مستعفی ہو رہا ہوں۔فردوس شمیم نقوی وزیر اعظم عمران خان کے پرانے ساتھی ہیں۔

تفصیلات کے مطابق فردوس شمیم نقوی نے آج منگل کو سندھ اسمبلی میں رکنیت سے مستعفی ہونے کا اعلان کرتے ہوئے کہا ہے کہ میں رکنیت سے احتجاجاً مستعفی ہو رہا ہوں۔سندھ اسمبلی میں اپوزیشن لیڈر حلیم عادل شیخ نے میڈیا سے گفتگو میں کہا کہ اسمبلی میں کل جو کیا گیا تھا وہ احساس دلانے کے لیے کیا گیا، اسمبلی کسی کے باپ کی جاگیر نہیں یہ عوام اور ممبران کی ہے، کل انھوں نے اسپیشل برانچ کےغنڈے بلاول ہاؤس سے بھجوائے، اس افسوس کے عالم میں فردوس شمیم نے استعفیٰ دیا۔

یاد رہے کہ گزشتہ روز سندھ اسمبلی اجلاس میں اپوزیشن اراکین کی جانب سے احتجاج کیا جا رہا تھا تو وہ اچانک چارپائی اور بستر لے آئے، جس نے اسمبلی کی کارروائی کو مذاق بنا دیا، اور جگ ہنسائی کا سبب بنا۔سیکریٹری سندھ اسمبلی عمر فاروق نے بتایا کہ اسمبلی اسٹاف نے چارپائی اندر لے جانے سے روکنے کی بھرپور کوشش کی تھی، لیکن پی ٹی آئی اراکین زبردستی چارپائی اندر لے آئے۔

آج اسپیکر سندھ اسمبلی آغا سراج درانی نے ایوان میں چارپائی لانے والے ارکان اسمبلی کے داخلے پر پابندی لگا دی، جن میں پی ٹی آئی کے پارلیمانی لیڈر بلال احمد سمیت سعید احمد، رابستان، ارسلان تاج، محمد علی عزیز، عدیل احمد، شاہ نواز جدون، اور راجہ اظہر خان شامل ہیں۔