عمران خان نے ہم سے کوئی ذکر نہیں کیا کہ ان سے کسی اہم شخصیت کی ملاقات ہوئی ہے، علیمہ خان

?️ 17 مئی 2025

اسلام آباد: (سچ خبریں) پاکستان تحریک انصاف کے بانی چیئرمین عمران خان کی ہمشیرہ علیمہ خان کا کہنا ہے کہ عمران خان نے ہم سے کوئی ذکر نہیں کیا کہ ان سے کسی اہم شخصیت کی ملاقات ہوئی ہے۔

میڈیا سے گفتگو کرتے ہوئے انہوں نے کہا کہ ہم کئی مہینوں سے دیکھ رہے ہیں کہ اڈیالہ جیل میں مقدمات کی سماعت روک دی گئی ہے، ہم منتظر ہیں کہ جج صاحب تھانہ آر اے بازار مقدمہ کی سماعت کے لیے جائیں تاکہ ہم بھی جا سکیں کیوں کہ ہم اڈیالہ میں سماعت کے لیے جانا چاہتے ہیں۔

علیمہ خان کا کہنا ہے کہ میرے اوپر 50 سے 60 پرچے درج ہو چکے ہیں، میرا گناہ صرف عمران خان کے پیغام کو آپ تک پہنچانا ہے، پچھلے 5 دنوں میں کبھی اسلام آباد ہائیکورٹ کبھی پشاور ہائیکورٹ کبھی انسداد دہشت گردی عدالت جارہے ہیں، آج تیسری مرتبہ پیش ہوئی ہوں، دو گھنٹے لگ گئے باور کروانے میں کہ میرے لیے ٹریولنگ کیوں ضروری ہے۔

انہوں نے یہ بھی کہا کہ ہم مورثی ہیں ہم مورثی تھے اور اپنے بھائی کے لیے ہم موروثی رہیں گے، عمران خان کے بیٹوں نے انٹرویو دیا ہے موروثی تھے تو دیا ہے، دو سال سے ہم بہنیں اپنے بھائی کے لیے کھڑی ہیں موروثی ہیں تو کھڑی ہیں، واضح بتا دوں اب اپنے بھائی کو کسی کو نقصان نہیں پہنچانے دیں گے۔

خیال رہے کہ سینئر صحافی نجم سیٹھی نے دعویٰ کیا ہے کہ 6 مئی کو عمران خان سے ایک غیر سیاسی شخصیت نے اڈیالہ میں ملاقات کرکے بھارت کے ساتھ ہونے والی کشیدگی پر بریفنگ دی، انہیں بالکل ایسے بریفنگ دی گئی جیسے وزیر اعظم کو بریفنگ دی جاتی ہے، جس میں عمران خان کو اعتماد میں لیا گیا اور انہیں بتایا گیا کہ بھارت پاکستان پر یہ الزامات لگا رہا ہے۔

انہوں نے بتایا کہ عمران خان کو اڈیالہ جا کر کہا گیا کہ ملک کی خاطر آپ اور آپ کی یوتھ کی ضرورت ہے، پی ٹی آئی کی یوتھ فوج کو کافی عرصے سےاٹیک کر رہی ہے وہ اب نہ کرے، جس کے جواب میں عمران خان نے کہا کہ آپ کے ساتھ اختلافات سیکنڈری ہیں، ہم آپ کے اور قوم کے ساتھ ہیں، ملک کی خاطر میں اپنی اندرونی لڑائی کو روک دیتا ہوں اور مودی کے خلاف آپ کے ساتھ ہوں، جس پر کہا گیا کہ آپ کا بہت شکریہ، ہمیں آپ سے یہی توقع تھی۔