صوبوں کو ویکسین منگوانے کیلئے وفاق سے کوئی این او سی نہیں چاہئے: فیصل سلطان

?️ 23 جون 2021

اسلام آباد(سچ خبریں) وزیراعظم کے معاون خصوصی برائے صحت ڈاکٹر فیصل سلطان کا کہنا ہےکہ صوبوں کو ویکسین منگوانے کے لیے وفاق سے کوئی این او سی نہیں چاہیے۔ حکومت اپنی بہترین حکمت عملی سے ویکسین کی بلاتعطل فراہمی یقینی بنا رہی ہے۔

ایک بیان میں ڈاکٹر فیصل سلطان نے کہا کہ مراد علی شاہ صاحب غلط بیانی سے کام لے رہے ہیں، وزیرصحت نے کئی مہینے پہلے آپ کو بتایا تھاکہ آپ پرویکسین منگوانے کیلئے کوئی پابندی نہیں اور ویکسین منگوانے کیلئے آپ کو وفاق سے کوئی این او سی نہیں چاہیے۔

ڈاکٹر فیصل سلطان کاکہنا ہے کہ حکومت کورونا ویکسین کی بلاتعطل فراہمی یقینی بنارہی ہے تاہم یہ بھی ایک مسلمہ حقیقت ہے کہ گلوبلی ویکسین کی کمی کا مسئلہ ہے۔اسلا م آباد میں معاون خصوصی ڈاکٹر فیصل سلطان کی زیر صدارت ہیلتھ اینڈ پاپولیشن تھنک ٹینک کا اجلاس ہوا جس میں وفاق اور صوبوں کے ہیلتھ ماہرین بھی شریک ہوئے۔

اجلاس میں کورونا سے بچاؤ کیلئے ویکسین کی کوریج بڑھانے کی حکمت عملی پر تبادلۂ خیال کیا گیا، فیصل سلطان نے بتایا کہ کورونا وائرس سے بچاؤ کیلئے حکومت اقدامات یقینی بنا رہی ہے۔ڈاکٹر فیصل سلطان کاکہنا تھا کہ ملک بھر میں دو ہزار سے زائد سینٹرز پر ویکسین لگائی جا رہی ہے، روزانہ تقریباً 3 سے 4 لاکھ سے زائد افراد کو ویکسین لگائی جا رہی ہے ۔انہوں نے کہاکہ ملک بھر 2 ہزار سینٹرز پر ویکسین کی بلاتعطل فراہمی یقینی بنانا ایک چیلنج تھا،یہ بھی ایک مسلمہ حقیقت ہے، گلوبلی ویکسین کی کمی کا مسئلہ ہے ۔

دوسری جانب این سی او سی نے ویکسی نیشن کے اعدادوشمار بھی جاری کیے ہیں۔این سی او سی کے مطابق گزشتہ 24 گھنٹوں میں ملک بھرمیں 3 لاکھ 75 ہزار159 افراد کو ویکسین لگائی گئی ہے اور اب تک ملک میں ایک کروڑ 38 لاکھ59 ہزار523 ویکسین لگائی جاچکی ہیں۔