تحریک انصاف کا عید الفطر کے 3 روز اڈیالہ جیل کے باہر احتجاج کا فیصلہ

?️ 26 مارچ 2025

راولپنڈی: (سچ خبریں) پی ٹی آئی نے عید الفطر کے 3 روز اڈیالہ جیل کے باہر احتجاج کرنے کا فیصلہ کرلیا۔ ڈان نیوز کے مطابق پبلک اکاؤنٹس کمیٹی کے چیئرمین اور پی ٹی آئی خیبر پختونخواہ کے سربراہ جنید اکبر کا کہنا ہے کہ پارٹی کارکن عید الفطر کے تینوں دن اڈیالہ جیل کے باہر احتجاج کریں گے، اگر حکومت ہم سے بات چیت کرنا چاہتی ہے تو اسے پہلا قدم اٹھانا ہوگا اور مذاکرات میں اپنی سنجیدگی کا مظاہرہ کرنا ہوگا۔

انہوں نے کہا کہ اپوزیشن اتحاد میں سب کچھ مثالی نہیں لیکن اس الائنس کو مضبوط بنانے کی کوشش کی جا رہی ہے، تحریک تحفظ آئین پاکستان کی جماعتیں ہماری حمایت کر رہی ہیں، اب ہم ان سیاسی قوتوں کی حمایت حاصل کرنے کی کوشش کر رہے ہیں جو پارلیمنٹ کا حصہ نہیں، اس سلسلے میں ہم نے جماعت اسلامی کی قیادت سے بھی رابطہ کیا ہے اور مجھے پوری امید ہے صورتحال میں بہتری آئے گی، پارٹیوں کے اندر کچھ اختلافات ہیں لیکن اس طرح کی چھوٹی رکاوٹیں اتحاد کو متاثر نہیں کریں گی، ہم عیدالفطر کے بعد اسلام آباد کی طرف مارچ کریں گے لیکن یہ بھی ممکن ہے ہم عیدالفطر کے 3 دن اڈیالہ جیل کے باہر احتجاج کریں۔

اسی حوالے سے پاکستان تحریک انصاف کے رہنماء فیصل جاوید کا کہنا ہے کہ پارٹی کی سینئر لیڈرشپ اپوزیشن جماعتوں سے رابطے میں ہے، عید کے بعد اچھی خبریں آئیں گی، آئین کی بالادستی اور جمہوریت کیلئے سب کو نکلنا ہوگا، اپوزیشن جماعتوں کا مضبوط الائنس بن رہا ہے، جو جماعتیں آئین، قانون اور جمہوریت کے ساتھ کھڑی ہوں گی ان کو پزیرائی ملے گی کیوں کہ وفاقی وزراء تو بیرونِ ملک دورے کر رہے ہیں لیکن انہیں عوام کی فکر نہیں، عوام مہنگائی کی چکی میں پس رہے ہیں اور کابینہ اپنی تنخواہیں بڑھا رہی ہے۔