تحریک انصاف ووٹوں سے اقتدارمیں آئی ہے،2023 سے پہلے الیکشن نہیں ہوں گے: گورنر پنجاب

?️ 23 مئی 2021

لاہور ( سچ خبریں) گورنر پنجاب چوہدری محمد سرور نے کہا ہے کہ ت حکومت آئینی مدت کا آخری دن بھی پورا کرے گی، عمران خان عوام کے حقیقی لیڈر ہیں مخالفین کے دباؤ میں نہیں آئیں گے تمام ادارے ایک پیج پرہیں ، 2023 سے پہلے نہ الیکشن ہوں گے نہ ہی حکومت کہیں جانے والی ہے۔

تفصیلات کے مطابق اپنے ایک بیان میں انہوں نے کہا کہ عمران خان عوام کے حقیقی لیڈر ہیں مخالفین کے دباؤ میں نہیں آئیں گے، حکومت آئینی مدت کا آخری دن بھی پورا کرے گی، 2023 سے پہلے نہ الیکشن ہوں گے اور نہ ہی حکومت کہیں جانے والی ہے، ملکی ترقی واستحکام کے لیے تمام حکومتی ادارے ایک پیج پر ہیں، کیوں کہ موجودہ حکومت نے ملک کو معاشی طور پر دیوالیہ ہونے سے بچایا ، سفارتی اور معاشی سمیت ہر شعبے میں پاکستان آگے بڑھ رہا ہے۔

چوہدری محمد سرور نے کہا کہ ملکی ترقی اور خوش حالی میں اوورسیز پاکستانیوں کا مثالی کردار ہے، نئے مالی سال کے دوران معیشت مزید تیزی سے ترقی کرے گی، روشن ڈیجیٹل پاکستان سے تر سیلات میں مسلسل ا ضافہ ہورہا ہے، احساس اور ہیلتھ کارڈ جیسے پروگرام حکومتی غریب دوستی کا ثبوت ہے، آج ملکی معیشت مستحکم ترقی کی شاہراہ پر گامزن ہے، ملکی ترقی اور خوش حالی میں اوورسیز پاکستانیوں کا مثالی کردار ہے۔

دوسری طرف پاکستان میں زرمبادلہ کے ذخائر بڑھ کر23 ارب ڈالرکی سطح پر پہنچ گئے، زرمبادلہ ذخائر میں مزید 16کروڑ77 لاکھ ڈالر کا اضافہ ہوا، مرکزی بینک کے ذخائر بڑھ کر15 ارب 77 کروڑ 45 لاکھ ڈالر ہوگئے ہیں، وزیرتوانائی حماد اظہر نے پریس کانفرنس میں کہا کہ ملک میں زرمبادلہ کے ذخائر بڑھ کر23 ارب ڈالرکی سطح پر پہنچ چکے ہیں۔

پاکستان ایکسپورٹ شعبے میں تیزی نظرآرہی ہے جس سے ملکی معیشت مستحکم ہوجائے گی، رواں سال 4 فیصد معاشی شرح حاصل کریں گے، رواں سال صرف مارچ کے دوران 3.2 ارب ڈالرکی ايکسپورٹ ريکارڈ کی گئیں، جب کہ توقع کی جارہی ہے کہ اس سال کے اختتام تک زیادہ گروتھ ہو۔

اسی طرح 18 مئی کو بھی اسٹیٹ بینک آف پاکستان کی جانب سے کہا گیا تھا کہ زرمبادلہ ذخائر میں مزید 16کروڑ77 لاکھ ڈالر کا اضافہ ہوگیا ہے، جس کے بعد مجموعی زرمبادلہ ذخائر بڑھ کر 22 ارب91 کروڑ 3 لاکھ ڈالر کی سطح پر پہنچ گئے ہیں ، مرکزی بینک کے ذخائر 17 کروڑ 66لاکھ ڈالر کے اضافے سے 15 ارب 77 کروڑ 45 لاکھ ڈالر جبکہ کمرشل بینکوں کے ذخائر89 لاکھ ڈالر کی کمی سے7 ارب 13 کروڑ 58 لاکھ ڈالر کی سطح پر ریکارڈ کیے گئے ہیں۔