بھارت کے ساتھ کشیدگی میں پاکستان نے ذمہ دارانہ کردار ادا کیا۔ اسحاق ڈار

?️ 15 جولائی 2025

اسلام آباد (سچ خبریں) نائب وزیراعظم اسحاق ڈار نے کہا ہے کہ بھارت کے ساتھ کشیدگی میں پاکستان نے ذمہ دارانہ کردار ادا کیا۔

تفصیلات کے مطابق نائب وزیر اعظم اسحاق ڈار نے ایس سی او وزرائے خارجہ کونسل اجلاس سے خطاب کرتے ہوئے کہا کہ دنیا کو درپیش چیلنجز میں ایس سی او کی اہمیت بڑھ گئی ہے۔ اور ایس سی او خطے میں امن، استحکام اور باہمی تعاون کا پلیٹ فارم ہے۔ پاکستان جارحیت کے خلاف اور عدم مداخلت کا حامی ہے۔

ذرائع کے مطابق انہوں نے کہا کہ پاکستان طویل مدتی تنازعات کے پرُامن حل کا حامی ہے۔ اور ایران پر اسرائیلی جارحیت اور امریکی حملے کی مذمت کرتے ہیں۔ غزہ میں اسرائیلی جارحیت پر بھی شدید تشویش ہے۔ اور عالمی برادری کو غزہ کی صورتحال پر کردار ادا کرنا چاہیئے۔

اسحاق ڈار نے کہا کہ عالمی برادری فلسطین کے خلاف اسرائیلی جارحیت کا فوری نوٹس لے۔ پاکستان فلسطین کے مسئلے کے دو ریاستی حل کا حامی ہے۔ اور متنازعہ علاقوں کی حیثیت تبدیل کرنے کی یکطرفہ کوششوں کی مخالفت کرتے ہیں۔

انہوں نے کہا کہ بھارت کے ساتھ کشیدگی میں پاکستان نے ذمہ دارانہ کردار ادا کیا۔ اور جنوبی ایشیا میں پائیدارامن کے لیے دیرینہ تنازعات کا حل ضروری ہے۔ پاکستان بھارت کے ساتھ سیز فائر پر عمل درآمد کے لیے پرعزم ہے۔