ایف آئی اے کی پی ٹی آئی کے خلاف تحقیقات جاری

25 اگست 2022

اسلام آباد: (سچ خبریں) ایف آئی اے کی تحریک انصاف کیخلاف ممنوعہ فنڈنگ کیس کی تحقیقات جاری ہیں،ایف آئی اے نے ممنوعہ فنڈنگ کیس کی تحقیقات میں تحریک انصاف کے 3 مرکزی اکاؤنٹس کا سراغ لگا لیا۔

نجی ٹی وی  نے ذرائع ایف آئی اے کا حوالہ دیتے ہوئے رپورٹ کیا ہے کہ تحریک انصاف کے تینوں اکاؤنٹس ووٹن کرکٹ کلب سے رقوم کی ترسیل کیلئے استعمال ہوئے،ان اکاؤنٹس سے بھاری رقوم بیرون ممالک سے پاکستان آئیں۔

ذرائع ایف آئی اے کے حوالے سے مزید بتایا گیا کہ طارق شفیع ہی وہ شخص ہیں جس نے انصاف ٹرسٹ کھولا تھا۔ایف آئی اے نے طارق شفیع کے اکاؤنٹس منجمد کرکے انہیں جواب کے لیے طلب کر لیا،جبکہ ایف آئی اے نے طارق شفیع اور عارف نقوی پر بیرون ممالک سفر کی عبوری پابندی عائد کر دی ہے۔

یاد رہے کہ گزشتہ دنوں چیئرمین تحریک انصاف عمران خان نے ممنوعہ فنڈنگ کیس میں ایف آئی اے کے نوٹس پر تفصیلات دینے سے انکار کر دیا تھا،عمران خان نے ایف آئی اے نوٹس کو بد نیتی قرار دے دیا۔

عمران خان اور پی ٹی آئی کی طرف سے سابق اٹارںی جنرل انور منصور نے ایف آئی اے کو تحریری جواب بھجوایا۔ ایف آئی اے کمرشل بینک سرکل اور اسلام آباد کی ڈپٹی ڈائریکٹر آمنہ بیگ کو تحریری جواب بھجوا گیا۔ عمران خان نے کہا کہ آپ کو جواب دہ ہوں اور نہ ہی معلومات دینے کا پابند ہوں،پی ٹی آئی سے تفصیلات اور دستاویزات طلب کرنا ایف آئی اے کے زیر اثر ہونے کا مظہر ہے۔ الیکشن کمیشن نے فیصلہ نہیں دیا بلکہ رپورٹ جاری کی ہے،اگر دو دن میں نوٹس واپس نہ لیا تو قانون کے تحت کارروائی کروں گا۔ گزشتہ دنوں ایف آئی اے نے چیئرمین تحریک انصاف عمران خان سے پی ٹی آئی کو ہونے والی فنڈنگ سے متعلق ریکارڈ مانگا تھا۔