اسلام آباد(سچ خبریں)وفاقی تحقیقاتی ادارہ ،ایف آئی اے نے پاکستان سے باہر رہنے والے تمام پاکستانی نژاد تارکین وطن کو خبردار کیا ہے کہ وہ بیرون ملک رہتے ہوئے پاکستان میں افراتفری پھیلانے سے باز رہیں اور جارحانہ سوشل میڈیا پوسٹس اور فتنہ انگیزی سے گریز کریں.
ایف آئی اے ترجمان کی جانب سے جاری کردہ 7نکاتی پریس ریلز میں بیرون ممالک مقیم پاکستانیوں کو مشورہ دیا گیا ہے کہ وہ پاکستان الیکٹرانک کرائمز ایکٹ (پیکا) 2016 کا مطالعہ کریں تاکہ یہ یقینی بنایا جا سکے کہ ان کی سوشل میڈیا پوسٹس خلاف قانون نہیں ہیں۔
پریس ریلیزمیں کہا گیا ہے کہ خلاف ورزی کی صورت میں ایسے افراد کی گرفتاری کے لیے انٹرپول کے ذریعے ریڈ نوٹس جاری کیا جاسکتا ہے یہ انتباہ قانون شکن کے لئے ہے قانون کی پاسداری کرنے والوں کو پریشان ہونے کی کوئی ضرورت نہیں. قبل ازیں ترجمان نے اینکر پرسن سمیع ابراہیم کے خلاف مختلف سوشل میڈیا پلیٹ فارمز پر ریاست مخالف ویڈیوز اور بیانات نشر کرنے پر انکوائری شروع کر دی ہے ایف آئی اے کے ترجمان کا کہنا ہے کہ سمیع ابراہیم ریاستی اداروں کے حوالے سے جعلی خبریں پھیلانے میں ملوث ہیں اور ان کے لگائے گئے الزامات مسلح افواج کے اہلکاروں کو بغاوت پر اکسانے کی واضح کوششیں ہیں.