افہام و تفہیم سے سینیٹ کے انتخابی عمل پر انگلیاں نہیں اٹھتیں، پیسے کا لین دین نہیں ہوتا۔ عرفان صدیقی

?️ 18 جولائی 2025

اسلام آباد (سچ خبریں) مسلم لیگ ن کے سینیٹر عرفان صدیقی کا کہنا ہے کہ افہام و تفہیم سے سینیٹ کے انتخابی عمل پر انگلیاں نہیں اٹھتیں، پیسے کا لین دین نہیں ہوتا، اس عمل سے ایوان بالا کا تقدس بھی برقرار رہتا ہے۔

تفصیلات کے مطابق سینیٹر عرفان صدیقی نے پارلیمنٹ ہاؤس کے باہر میڈیا سے گفتگو میں کہا کہ یہ ایک اچھی روایت چلی ہے کہ اتفاقِ رائے سے نام آ رہے ہیں، جب میں پنجاب سے آیا تھا تو اس وقت بھی انتخابی عمل کی نوبت نہیں آئی تھی۔ ان کا کہنا ہے کہ سینیٹ کے معاملات افہام و تفہیم سے طے ہو گئے تھے، سینیٹ میں جس کی جتنی نشستیں بنتی ہیں انہیں دے دی جائیں اور یہ اچھا عمل ہے۔

ذرائع کے مطابق عرفان صدیقی نے کہا ہے کہ پی ٹی آئی والوں کی صوابدید ہے کہ 5 اگست کو مظاہرے کریں یا 90 دن بعد کریں، پی ٹی آئی والے روایات، بات چیت اور سیاست میں زیادہ یقین نہیں رکھتے۔ انہوں نے کہا کہ پی ٹی آئی والے لڑائی احتجاج کی سیاست پر یقین رکھتے ہیں، پی ٹی آئی کا تجربہ احتجاج سے ہے تو انہوں نے لاہور جا کر بھی یہی کیا، ہم سڑکیں بناتے رہیں گے، وہ چوراہوں، سڑکوں کو آباد رکھیں اور احتجاج کریں۔

مسلم لیگ ن کے سینیٹر عرفان صدیقی کا یہ بھی کہنا ہے کہ پی ٹی آئی کو یقین ہو جانا چاہیے کہ ان کے پاس احتجاج کی طاقت ہے نہ عوام ان کے لیے نکلیں گے، پی ٹی آئی صرف معاشی ابتری، انتشار اور احتجاج کرنا چاہتی ہے۔