کراچی: (سچ خبریں) پاکستان اسٹاک ایکسچینج میں زبردست تیزی کا رجحان ہے، آج بینچ مارک کے ایس ای-100 انڈیکس 770 پوائنٹس اضافے سے 82 ہزار کی نئی بلند ترین سطح پر پہنچ گیا ہے۔
پاکستان اسٹاک ایکسچینج ویب سائٹ کے مطابق صبح تقریباً 10 بج کر 49 منٹ پر کے ایس ای-100 انڈیکس 770 پوائنٹس یا 0.95 فیصد بڑھ کر 82 ہزار 229 پر پہنچ گیا، جو گزشتہ روز 81 ہزار 459 پر بند ہوا تھا۔
چیس سیکیورٹیز کے ڈائریکٹر ریسرچ یوسف ایم فاروق نے اس رجحان کو گزشتہ روز حکومتی بانڈز کے شرح منافع میں کمی سے منسلک کیا۔
ان کا کہنا تھا کہ مارکیٹ توقع کر رہی ہے کہ مہنگائی اور شرح سود میں تیزی سے کمی ہوگی۔
گزشتہ روز پاکستان انویسٹمنٹ بانڈز کے تین سالہ مدت کے شرح منافع میں 335 بیسس پوائنٹس کی نمایاں کمی کی گئی جبکہ حکومت نے ہدف سے 50 فیصد کم قرض لیا۔
اے کے ڈی سیکیورٹیز کے ڈائریکٹر ریسرچ اویس اشرف نے ڈان ڈاٹ کام کوبتایا کہ بین الاقوامی مالیاتی فنڈ (آئی ایم ایف) کے ایگزیکٹو بورڈ کی متوقع منظوری اور شرح سود میں کمی کے بعد پاکستان انویسٹمنٹ بانڈز کی گزشتہ روز نیلامی میں ریٹرن کی شرح میں تنزلی نے مارکیٹ میں مثبت رجحان پیدا کیا۔
ایف آر آئی ایم وینچرز کے چیف انویسٹمنٹ افسر شہباز اشرف نے نوٹ کیا کہ گزشتہ ہفتے سے مارکیٹ میں 3.6 فیصد یا 2800 پوائنٹس کا اضافہ ہوا ہے۔
واضح رہے کہ گزشتہ روز مقامی سطح پر مثبت معاشی اشاریے اور فیڈرل ریزرو کی جانب سے پالیسی ریٹ میں معمول سے بڑی کمی نے سرمایہ کاروں کا اعتماد بڑھایا اور بینچ مارک کے ایس ای 100 انڈیکس تقریباً 1500 پوائنٹس اضافہ کے بعد81 ہزار کی سطح عبور کرگیا تھا۔
