اسلام آباد کو مثالی شہر بنانے کا وقت آگیا ہے

🗓️ 4 جون 2021

اسلام آباد (سچ خبریں) وزیراعظم عمران خان کا کہنا ہے کہ معاشی استحکام حاصل ہونے کے ساتھ ساتھ اب اسلام آباد کو ایک مثالی شہر بنانے کا وقت آ چکا ہے، اس مقصد کے لیے اصلاحات اور تنظیم نو ترجیح ہوگی۔ مائیکرو بلاگنگ ویب سائٹ ٹویٹر پر اپنے پیغام میں وزیراعظم عمران خان نے کہا کہ پاکستان بدل رہا ہے۔

انہوں نے ٹویٹر پیغام میں سی ڈی اے کو مبارکباد دیتے ہوئے کہا کہ تقریباً دیوالیہ ہونے والے ادارے سی ڈی اے کا 2017ء میں 5.8 ارب روپے کا خسارہ تھا، سی ڈی اے رواں مالی سال میں 73 ارب روپے سرپلس میں جائے گا، سی ڈی اے کے اکاونٹس میں 26 ارب روپے پہلے سے ہی موجود ہیں۔

انہوں نے کہا کہ ڑے شہروں کو بھی شفافیت اور عزم کے ساتھ ترقی اور جدت کی طرف لایا جاسکتا ہے، پاکستان بدل رہا ہے، ملک میں معاشی ترقی ہو رہی ہے۔

وزیراعظم عمران خان نے سی ڈی اے کی کارکردگی کی تعریف بھی کی۔ وزیراعظم عمران خان کا کہنا تھا کہ ہماری ترجیح اسلام آباد میں اصلاحات اور شہر کی تنظیم نو پرہوگی، ہمارے بڑے شہر عزم اور شفافیت کے ذریعے خود انحصار بن کر ترقی کے انجن بھی بن سکتے ہیں۔

یاد رہے کہ قبل ازیں وزیراعظم عمران خان نے سی ڈی اے میں اصلاحات کے لیے چیئرمین سی ڈی اے عامر احمد علی کو خصوصی ٹاسک سونپا تھا، وزیراعظم کی ہدایت پر چیئرمین سی ڈی اے عامر احمد علی نے شہر کی تنظیم نوکے لیے ہنگامی بنیادوں پر کام کیا، وزیراعظم نے چیئرمین سی ڈی اے کے ہمراہ اسلام آباد کے مختلف علاقوں کے دورے بھی کیے۔ وزیراعظم نے سی ڈی اے کی جانب سے جاری ترقیاتی کاموں کو بھی سراہا۔