اسرائیل کا کوئی مستقبل نہیں، مستقبل فلسطین کاہے: سربراہ مجلس وحدت المسلمین

?️ 29 اکتوبر 2023

اسلام آباد: (سچ خبریں) مجلس وحدت المسلمین (ایم ڈبلیو ایم) کے سربراہ علامہ راجا ناصر عباس نے کہا ہے کہ اسرائیل کا کوئی مستقبل نہیں، مستقبل فلسطین کا ہے۔

اسلام آباد میں ایم ڈبلو ایم کے زیراہتمام فلسطین کانفرنس سے خطاب کرتے ہوئے انہوں نے کہا کہ مظاہرے کرنا سب کا آئینی حق ہے، جماعت اسلامی کے احتجاجی مظاہرے پر پولیس کی چڑھائی کی مذمت کرتے ہیں۔

انہوں نے کہا کہ دنیا بھر میں اسرائیل اور امریکا کے سفارت خانوں کے باہر مظاہرے ہو رہے ہیں، لیکن پاکستان میں شاہ سے زیادہ شاہ کے وفادار بیٹھے ہوئے ہیں۔

کانفرنس سے اپنے خطاب میں ایران کے سفیر رضا امیری نے کہا کہ امریکی اور یورپی عوام بھی اپنی حکومتوں کے خلاف احتجاج کر رہے ہیں، اسرائیل نہتے شہریوں کو نشانہ بنا رہا ہے جو کہ جنگی جرم ہے۔

ادھر وفاقی دارالحکومت اسلام آباد میں اسرائیلی مظالم کے خلاف غزہ مارچ کے معاملے پر جماعت اسلامی اور مقامی انتظامیہ آمنے سامنے آگئیں۔

جماعت اسلامی کے مطابق اسلام آباد کی ضلعی انتظامیہ نے مارچ کی اجازت دینے سے انکار کردیا تھا جبکہ ضلعی انتظامیہ کا کہنا تھا کہ دفعہ 144 کی پابندی کے باوجود جماعت اسلامی نے مارچ اور احتجاج کی کال دی ہے، اس کی اجازت نہیں دی جاسکتی۔

رہنما جماعت اسلامی میاں اسلم نے الزام عائد کیا کہ پولیس نے کیمپ اکھاڑ کر کارکنوں کو تشدد کا نشانہ بنایا۔

سری نگر ہائی وے پر جماعت اسلامی کے دھرنے کے بعد کارکنوں کی پولیس سے جھڑپیں ہوئیں۔ اسلام آباد پولیس نے جماعت اسلامی کے کارکنوں پر شیلنگ کی جبکہ کارکنوں نے پولیس پر پتھراؤ کیا۔

پولیس کی شیلنگ کے بعد مظاہرین منتشر ہوگئے اور سری نگر ہائی وے ٹریفک کیلئے کھول دی گئی۔

ترجمان کے مطابق جماعت اسلامی مظلوم فلسطینیوں سے اظہار یکجہتی کیلئے ہر صورت مارچ کرے گی۔

Short Link

Copied