سچ خبریں: تحریک انصاف کے رہنما ذلفی بخاری نے اپنے ایک بیان میں کہا ہے کہ ہماری دعائیں اسماعیل ہنیہ کے خاندان کے ساتھ ہیں اور پاکستانی عوام فلسطینیوں کی حمایت میں کھڑی ہے۔
ذلفی بخاری نے کہا کہ اسماعیل ہنیہ کے قتل نے اسرائیلی وزیراعظم نیتن یاہو اور اسرائیل کی تنازع کو بڑھانے کے ارادے کو بے نقاب کر دیا ہے۔
یہ بھی پڑھیں: اسماعیل ہنیہ کی شہادت پر حماس کا اسرائیل کو سخت انتباہ
انہوں نے مزید کہا کہ غیر ملکی سرزمین پر قتل ایران کی خود مختاری کی خلاف ورزی ہے اور اس عمل سے اسرائیل نے جنگ بندی کی اپنی تجویز کو نقصان پہنچایا ہے۔
ذلفی بخاری نے کہا کہ اسرائیل اپنے مفادات کے لیے بین الاقوامی قوانین کو نظر انداز کرتا ہے۔
7 اکتوبر کے بعد سے اسرائیل نے غزہ میں خواتین اور بچوں پر ظلم ڈھایا ہے اور اپنی غیر متناسب جارحیت میں اضافہ چاہتا ہے۔
واضح رہے کہ گزشتہ روز فلسطینی مزاحمتی تنظیم حماس کے سیاسی سربراہ اسماعیل ہنیہ ایران کے دارالحکومت تہران میں اسرائیلی حملے میں شہید ہوگئے تھے۔
مزید پڑھیں: تہران میں اسماعیل ھنیہ کا بزدلانہ قتل
وہ ایرانی صدر کی تقریب حلف برداری میں شرکت کے لیے ایران گئے تھے۔
حماس نے بتایا تھا کہ اس حملے میں اسماعیل ہنیہ اور ان کا ایک محافظ شہید ہوئے ہیں۔
