یوکرین بحران کا آغاز کرنے والا امریکہ ہے:چین

31 جنوری 2023

سچ خبریں:چین کی وزارت خارجہ نے ایک بیان میں ریاستہائے متحدہ امریکہ کو یوکرین کے بحران کا سب سے بڑا آغاز کرنے والا قراردیتے ہوئے واشنگٹن سے کیف کو ہتھیاروں کی فراہمی بند کرنے کا مطالبہ کیا۔

روسی خبر رساں ایجنسی ریانووستی کی رپورٹ کے مطابق چین کی وزارت خارجہ نے ایک بیان میں یوکرین کے بحران کو ہوا دینے میں امریکہ کے کردار پر زور دیتے ہوئے واشنگٹن سے کیف کو ہتھیاروں کی امداد بند کرنے کا مطالبہ کیا، رپورٹ کے مطابق یوکرین کی جنگ کے حوالے سے امریکہ کے موقف پر تنقید کرتے ہوئے چین کی وزارت خارجہ نے کہا کہ امریکہ یوکرین کے بحران کا سب سے بڑا آغاز کرنے والا ہے،چینی وزارت خارجہ کا کہنا ہے کہ اگر وہ واقعی یوکرین کے لوگوں کی پرواہ کرتے ہیں، تو انہیں یوکرین کو ہتھیاروں کی فراہمی بند کر دینی چاہیے۔

واضح رہے کہ چین کی وزارت خارجہ کی جانب سے یوکرین کی فوجی امداد میں اضافے کے حوالے سے امریکہ کے اقدام پر ردعمل ایسے وقت میں سامنے آیا ہے جبکہ یوکرین میں روسی فوجی کارروائی کے آغاز کے بعد سے مغربی ممالک بالخصوص امریکہ اور برطانیہ نے روس پر پابندیوں کا دباؤ بڑھا کر اور ہلکے اور بھاری ہتھیاروں کی سپلائی کر کے یوکرین میں بدامنی کی آگ کو ہوا دی ہے۔

دوسری جانب امریکی صدر جو بائیڈن نے گزشتہ ماہ یوکرین کے صدر ولادیمیر زیلنسکی کے دورہ واشنگٹن کے دوران اعلان کیا تھا کہ امریکہ کیف کو پیٹریاٹ ایئر ڈیفنس سسٹم فراہم کرے گا جبکہ حال ہی میں واشنگٹن پوسٹ نے اطلاع دی تھی کہ واشنگٹن اور برلن نے روس کے خلاف لڑنے کے لیے امریکی ابرامز اور جرمن لیپرڈ ٹینک یوکرین بھیجنے پر اتفاق کیا ہے، تاہم اس نے اس حوالے سے کوئی تفصیلات شائع نہیں کیں۔

یاد رہے کہ واشنگٹن اور برلن کی جانب سے یوکرین میں ٹینک بھیجنے کے فیصلے کے اعلان کے بعد روس نے خبردار کیا ہے کہ نیٹو کے بھیجے گئے یہ ٹینک بھی دیگر ہتھیاروں کی طرح روسی فوج کی آگ میں جل کر خاکستر ہو جائیں گے۔