نیتن یاہو غزہ جنگ دوبارہ شروع کرنا چاہتے ہیں:اسرائیلی میڈیا

نیتن یاہو غزہ جنگ دوبارہ شروع کرنا چاہتے ہیں:اسرائیلی میڈیا

اسرائیلی میڈیا نے انکشاف کیا ہے کہ امریکی وعدوں کے باوجود، جن میں غزہ میں جنگ بندی کو مستحکم کرنے اور تعمیر نو شامل ہے، اسرائیلی قیادت غزہ پر دوبارہ بھرپور فوجی کارروائی کی منصوبہ بندی کر رہی ہے۔ اسرائیلی ٹی وی چینل ۱۳ کی رپورٹ کے مطابق صہیونی حکام ثالثی کی کوششوں کو نظرانداز کرتے ہوئے غزہ میں جنگ کے دوبارہ آغاز کے خواہاں ہیں۔

رپورٹ میں کہا گیا ہے کہ اسرائیلی حکام امریکی صدر ڈونلڈ ٹرمپ کے مجوزہ جنگ بندی منصوبے کے دوسرے مرحلے پر عمل درآمد سے انکار کر رہے ہیں اور اس کے بجائے غزہ پر وسیع پیمانے پر فوجی حملے دوبارہ شروع کرنے کی تیاری کر رہے ہیں، جو عملی طور پر جنگ بندی کی خلاف ورزی کے مترادف ہے۔

اسی دوران اسرائیلی وزیر اعظم بنیامین نیتن یاہو آئندہ ہفتے امریکی صدر سے ملاقات کے لیے فلوریڈا کے شہر میامی کا دورہ کرنے والے ہیں۔ یہ ملاقات ایسے وقت میں ہو رہی ہے جب اسرائیلی حکام یہ دعویٰ کر رہے ہیں کہ غزہ میں جنگ کا دوبارہ آغاز ٹرمپ منصوبے کے دوسرے مرحلے کا حصہ ہو سکتا ہے۔

چینل ۱۳ کے مطابق نیتن یاہو نے گزشتہ ہفتے سکیورٹی اور عسکری حکام کے ساتھ ایک اہم اجلاس منعقد کیا جس میں غزہ میں دوبارہ داخلے اور بڑے پیمانے پر فوجی کارروائی کی تیاری پر زور دیا گیا۔ رپورٹ میں یہ بھی کہا گیا ہے کہ اسرائیل کا اندازہ ہے کہ امریکہ جنگ بندی کو برقرار رکھنے اور غزہ کو غیر فوجی بنانے کے لیے کوئی کثیر القومی فورس تشکیل دینے میں ناکام رہے گا، جس کے باعث فوجی آپشن کو واحد حل سمجھا جا رہا ہے۔

اسرائیلی وزیر خزانہ بتسلئیل اسموٹریچ نے بھی عندیہ دیا ہے کہ اسرائیل کو ممکنہ طور پر انتخابات سے قبل غزہ اور لبنان میں نئی فوجی کارروائیاں کرنا پڑ سکتی ہیں اور موجودہ جنگ بندی طویل عرصے تک برقرار رہنے کا امکان کم ہے۔

دوسری جانب امریکہ نے غزہ کی تعمیر نو کے لیے ایک کثیر مرحلہ منصوبہ پیش کیا ہے جس میں انسانی امداد، فلسطینی قیدیوں کی واپسی، بعض علاقوں سے فوجی انخلا اور بین الاقوامی نگرانی میں ایک امن کونسل کے قیام جیسے نکات شامل ہیں۔ تاہم امریکی خصوصی نمائندے اسٹیو وٹکوف نے واضح کیا ہے کہ اس منصوبے کا دوسرا مرحلہ تمام فریقوں کے تعاون کے بغیر ممکن نہیں۔

امریکی صدر ٹرمپ نے بھی غزہ کے انتظام کے لیے ایک امن کونسل کے قیام کا وعدہ کیا ہے جس کے ارکان ۲۰۲۶ کے آغاز میں متعارف کرائے جانے کا امکان ہے۔ اسی تناظر میں وال اسٹریٹ جرنل نے جیرڈ کوشنر کی سرپرستی میں ایک منصوبے کا ذکر کیا ہے جس کا مقصد غزہ کو مشرق وسطیٰ کی جدید ٹیکنالوجی پر مبنی شہر میں تبدیل کرنا ہے، تاہم ماہرین کے مطابق یہ منصوبہ زمینی حقائق سے مطابقت نہیں رکھتا۔

ماہرین کا کہنا ہے کہ جب تک غزہ کا محاصرہ ختم اور اسرائیلی قبضہ ختم نہیں ہوتا، اس نوعیت کے منصوبے محض کاغذی خواب ہی رہیں گے اور خطے میں پائیدار امن کے بجائے اسرائیلی فوجی تسلط کو مزید مضبوط کریں گے۔ایران کے جدید میزائل نظام سے اسرائیل میں بڑھتی ہوئی تشویش