میرا نہ اخوان المسلمین سے تعلق ہے نہ داعش سے: جولانی

میرا نہ اخوان المسلمین سے تعلق ہے نہ داعش سے: جولانی

 شدت پسند تنظیم ہیئت تحریر الشام کے سربراہ احمد حسین الشرع المعروف ابومحمد جولانی، جو خود کو شام کی عبوری حکومت کا سربراہ قرار دیتے ہیں، نے کہا ہے کہ ان کا کسی بھی صورت اخوان المسلمین سے کوئی تعلق نہیں اور وہ داعش کے اقدامات سے سب سے زیادہ نقصان اٹھانے والوں میں سے ہیں۔

کویتی اخبار النهار کو دیے گئے ایک انٹرویو میں جولانی نے شام کی داخلی صورتحال، علاقائی سیاست اور بیرونی تعلقات پر اپنے مؤقف کا اظہار کیا۔

انہوں نے کہا کہ شام کی وحدت کے خلاف کوئی بھی منصوبہ ایک ناقابلِ عمل خواب ہے اور کرد فورسز (قسد) یا السویداء کے دروزی باشندوں کے ساتھ کسی بھی حل کی بنیاد ملک کی جغرافیائی یکجہتی پر ہونی چاہیے۔ جولانی نے دعویٰ کیا کہ ان کی حکومت کی پالیسی صبر پر مبنی ہے نہ کہ انتقام پر۔

اسرائیل کے بارے میں بات کرتے ہوئے انہوں نے کہا کہ دمشق کے ساتھ تعلقات صرف اسی وقت ممکن ہیں جب جولان کی مقبوضہ پہاڑیاں شام کو واپس ملیں اور 1974 کا معاہدہ مکمل طور پر نافذ ہو۔ اس سے قبل صلح کے کسی امکان کی بات نہیں کی جا سکتی۔

انہوں نے لبنان کے داخلی معاملات میں کسی بھی شامی مداخلت کی مخالفت کی اور عراق کی سیاسی و اقتصادی پالیسیوں کو سراہتے ہوئے کہا کہ اس کا کردار خطے کے لیے اہم ہے۔

جولانی نے شام کے مستقبل کو روشن قرار دیا اور کہا کہ ملک اپنی داخلی قوت کے ساتھ ساتھ علاقائی و عالمی اتحادوں سے بھی مزید طاقت حاصل کرے گا۔

ابومحمد جولانی 1982 میں درعا، جنوبی شام میں پیدا ہوئے۔ شام کے بحران کے آغاز پر وہ عراق سے القاعدہ کے ساتھ آئے اور جبهة النصره کی بنیاد رکھی جو بعد میں جبهة فتح الشام اور پھر ہیئت تحریر الشام میں تبدیل ہوئی۔ جولانی آج بھی اس تنظیم کی قیادت کر رہے ہیں۔

گزشتہ برسوں میں انہوں نے اپنی شبیہ بدلنے کی کوشش کی ہے تاکہ ایک شدت پسند رہنما کے بجائے خود کو ایک سیاسی شخصیت کے طور پر پیش کریں اور بشار الاسد کی حکومت کے خاتمے کے بعد خود کو شام کا ممکنہ صدر دکھا سکیں۔