عراقی مزاحمتی تحریک کی امریکہ کو خطرناک دھمکی

28 جون 2021

سچ خبریں:عراقی مزاحمتی گروپوں نے ایک مشترکہ بیان میں کہا کہ امریکہ کو الحشد الشعبی کے خلاف جرم کرنے پرہمارے انتقام کا تلخ ذائقہ چکھنا پڑے گا۔

بغداد الیوم کی رپورٹ کے مطابق عراقی مزاحمتی گروپوں نے پیر کے روز شام کی سرحد پر الحشد الشعبی کے ٹھکانوں پر حالیہ امریکی فوج کی جارحیت پر ردعمل کا اظہار کیا،عراقی مزاحمتی تحریک کے مشترکہ بیان میں کہا گیا ہے کہ ہم نے بار بار کہا ہے کہ عراق میں امریکی فوجی موجودگی عراقی آئین کے خلاف ہےلہذا ہم عراقیوں کے خلاف امریکی دشمنانہ اقدامات اور جارحیت کے مقابلہ میں خاموش نہیں رہیں گے، یہ ایک ایسا پیغام ہے جسے امریکیوں کو سمجھنا چاہئے۔

واضح رہے کہ اس سے قبل بھی عراق کی مزاحمتی تنظیم کتائب سید الشہداء نے ایک بیان جاری کیا تھاجس میں کہا گیا تھاکہ آج کے بعد امریکی قابضین کے ساتھ ہماری جنگ لامحدود ہوگی، اس سلسلے میں پہلا قدم عراقی فضا میں موجود دشمن کے جنگی طیاروں کو نشانہ بنانا ہے۔

یادرہے کہ امریکی لڑاکا طیاروں نے آج صبح شام – عراق سرحد پر بوکمال کے علاقے میں الحشد الشعبی کے ٹھکانوں کو نشانہ بنایا، شامی ذرائع نے بتایا کہ اس حملے میں ایک بچہ شہید اور تین شہری زخمی ہوئے ہیں، عراقی ذرائع کے مطابق شام عراق سرحد پر امریکہ کے حملے کے دوران چار فوجی بھی شہید ہوئے۔

تاہم امریکیوں کا دعوی ہے کہ انہوں نے یہ فوجی جارحیت دہشت گردی سے لڑنے کے مقصد سے کی ہے!واضح رہے کہ الحشد الشعبی کے خلاف امریکی فوج کی نئی جارحیت اس وقت سامنے آئی جب سیاسی جماعتیں اور تحریکیں عراقی سرزمین سے امریکیوں کے انخلا کا مطالبہ کررہی ہیں ، قبل ازیں عراقی رکن پارلیمنٹ ایوب الربیعی نے ملک میں امریکی فوجیوں کی مسلسل موجودگی کے بارے میں بات کی تھی،انھوں نے کہا کہ امریکہ ہمارے ملک سے جانے والا نہیں جبکہ غیر ملکی فوجیوں کے انخلا کے سلسلہ میں پارلیمنٹ کا مسودہ بالکل واضح ہے۔