طالبان پر تنقید کرنے کے جرم میں افغان پروفیسر گرفتار

?️ 10 جنوری 2022

سچ خبریں:افغانستان میں طالبان نے حکومت پر تنقید کرنے کے الزام میں یونیورسٹی کے ایک پروفیسر کو گرفتار کر لیا ہے۔
ایکس پریس کی رپورٹ کے مطابق افغانستان میں طالبان نے اپنی حکومت پر کھل کر تنقید کرنے والے اس ملک کی یونیورسٹی کے ایک پروفیسر فیض اللہ جلال کو گرفتار کر لیا ہے، اطلاعات کے مطابق افغان یونیورسٹی کے پروفیسر فیض اللہ جلال کو کابل میں گرفتار کیا گیا ہے اور طالبان کے انٹیلی جنس ادارے اُن سے تفتیش کر رہے ہیں۔

سماجی رابطے کی ویب سائٹ ٹوئٹر پر طالبان کے ترجمان ذبیح اللہ مجاہد نے کہا ہے کہ پروفیسر فیض اللہ جلال کو سوشل میڈیا پر لوگوں کو حکومت کے خلاف اکسانے اور شہریوں کے وقار سے کھیلنے کے الزام میں حراست میں لیا گیا ہے، طالبان کے ترجمان کا مزید کہنا تھا کہ پروفیسر کے نام یا اسکالر ہونے کے بنا پر کسی کو بھی دوسروں کے عزت و وقار پر منفی تبصرے کرنے کی اجازت نہیں دی جاسکتی۔

ذبیح اللہ مجاہد نے پروفیسر فیض اللہ جلال کے ٹویٹس کے اسکرین شاٹس بھی دکھائے جس میں انھوں نے لکھا تھا کہ طالبان کی نئی حکومت افغانیوں کو گدھا سمجھتی ہے اور طالبان حکومت پڑوسی ملک کے ہاتھوں میں کھیل رہی ہے،یادرہے کہ پروفیسر فیض اللہ جلال طالبان کو غیر جمہوری حکومت قراردیتے ہوئے اسے افغانستان کے اقتصادی بحران کا ذمہ دار سمجھتے ہیں۔