صیہونی فوج میں ہائی الرٹ جاری

16 مارچ 2022

سچ خبریں:صیہونی عسکریت پسندوں کے ہاتھوں دو فلسطینی نوجوانوں کی شہادت اور نابلس میں احتجاجی مظاہروں میں اضافے کے بعد صیہونی فوج میں ہائی الرٹ جاری کر دیا گیا ہے۔
المیادین نیوز چینل نے اپنی ایک رپورٹ میں لکھا ہے کہ صیہونی حکومت کی فضائی سکیورٹی اور انٹیلی جنس الرٹ ہیں، یہ الرٹ گزشتہ روز نابلس میں اسرائیلی فوج کے ہاتھوں دو نوجوانوں کی شہادت کے بعد سامنے آیا ہے۔

واضح رہے کہ فلسطینی وزارت صحت نے منگل کی صبح اعلان کیا کہ اسرائیلی فورسز نے مقبوضہ مغربی کنارے میں الگ الگ حملوں میں دو فلسطینیوں کو شہید اور متعدد کو زخمی کر دیا،فلسطینی وزارت صحت نے بتایا کہ شمال مغربی شہر نابلس میں بلاتا پناہ گزین کیمپ پر صیہونی حملے میں 16 سالہ نادر ریان گولی لگنے سے شہید ہوا جبکہ تین دیگر فلسطینی زخمی ہوئے۔

رپورٹ کے مطابق یروشلم کے باہر قلندیہ پناہ گزین کیمپ میں ایک اور فلسطینی علا شیحام، جس کی عمر تقریباً 20 سال تھی شہید ہوا، وزارت نے کہا کہ قلندیہ میں چھ دیگر فلسطینی زخمی ہوئے اور انہیں ہسپتال لے جایا گیا۔

درایں اثنا صیہونی حکومت کی نیم فوجی سرحدی پولیس نے اعلان کیا ہے کہ صیہونی فورسز نے لوگوں کو گرفتار کرنے کے دوران حملہ کیا ہے،یادرہے کہ گذشتہ رات مغربی کنارے کے شمال میں واقع نابلس پر اسرائیلی فوج کے حملے کے بعد اسرائیلی فوجیوں نے متعدد فلسطینیوں کو پلاسٹک کی گولیوں سے زخمی کیا اور آنسو گیس کا استعمال کیا۔