شام کے خلاف سب سازشیں ناکام ہو چکی ہیں: شامی وزیر خارجہ

30 نومبر 2021

سچ خبریں:شام کے وزیر خارجہ نے اعلان کیا کہ شامی فوج کی کامیابیوں اور عوام کی فتح نے ہمارے خلاف تیار کی جانے والی سازشوں اور منصوبوں کو ناکام بنا دیا۔
شام کی سرکاری نیوز ایجنسی سانا کی رپورٹ کے مطابق اس ملک کے وزیر خارجہ فیصل المقداد نے کہا کہ ہماری فوج کی کامیابیوں اور عوام کی فتح نے ہمارے ملک کے لیے تیار کی جانے والی سازشوں اور منصوبوں کو ناکام بنا دیا ہے،المقداد نے مزید کہاکہ گذشتہ برسوں کے دوران، میں نے جن تمام ممالک کے وزرائے خارجہ اور حکام سے ملاقاتیں کی ہیں ،انھوں نے خطے میں شام کے کردار کی اہمیت اور اس کردار کو ادا کرنے کے لیے اپنی دلچسپی ظاہر کی ہے۔

المقداد کے مطابق ہمارے ملک کے استحکام، اتحاد اور ارضی سالمیت کو نشانہ بنانے والے دہشت گردوں اور دشمنوں کے خلاف شام کا دلیرانہ موقف دنیا کے لیے سبق آموز ہے کیونکہ شامی فوج، عوام اور حکومت کے عزم نے انھیں ہتھیار ڈالنے پر مجبور کیا ، یہی وجہ ہے کہ دشمن کی سازشیں اور منصوبے ناکام رہے۔

فیصل مقداد نے فلسطینی عوام کے ساتھ یکجہتی کے عالمی دن کے موقع پر ایک پیغام میں کہا کہ یہ دن ایک عالمی ٹربیون بن چکا ہے جو عالمی برادری کے ذہنوں میں فلسطینی کاز کو زندہ رکھتا ہے، انہوں نے مسئلہ فلسطین کو لاحق خطرات کا ذکر کرتے ہوئے کہا کہ آج تک عالمی برادری کی جانب سے اسرائیلی قبضے کو ختم کرنے میں کوئی پیش رفت نہیں ہوئی ہے۔

المقداد کے مطابق اسرائیلی قابضین کے لیے بعض عرب ممالک کی حمایت یروشلم میں یہودی آباد کاری کے منصوبوں کو تیز کرنے اور مغربی کنارے اور مقبوضہ شامی گولان کے بڑے حصوں کو ضم کرنے کی اس حکومت کی کوششوں میں ایک اہم عنصر ہے۔