دینی رہبروں کو فلسطنیوں پر ہونے والے ظلم کے خلاف آگے آنا چاہیے؛پوپ فرانسس اور آیت اللہ سیستانی کی ملاقات کے بعد بیانیہ

?️ 6 مارچ 2021

سچ خبریں:عراقی شیعوں کے مرجع عالی قدر آیت اللہ سیستانی کے دفتر نے ان کے اور عالمی کیتھولک رہنما کے درمیان نجف اشرف میں ملاقات کے حوالے سے ایک بیان جاری کیا ہے۔
المیادین نیوز چینل کی رپورٹ کے مطابق عراقی شیعوں کے مرجع عالی قدر آیت اللہ سید علی سیستانی کے دفتر نےنجف اشرف میں ان کے ساتھ کیتھولک دنیا کے رہنما پوپ فرانسس سے ملاقات کے حوالے سے ایک بیان جاری کیاجس میں کہا گیا ہے کہ ملاقات کے دوران موجودہ دور کے انسانوں کو درپیش بڑے چیلنجوں پر تبادلہ خیال کیا گیا، بیان میں کہا گیا ہے ،دنیا کے بہت سے ممالک خصوصا فلسطینی عوام مقبوضہ علاقوں میں ظلم ، غربت ، بنیادی آزادیوں اور معاشرتی انصاف کے فقدان نیز جنگ اور معاشی محاصرے کا شکار ہیں لہذا مذہبی اور روحانی پیشواؤں کو ان تکلیفوں کو کم کرنے کے لئے اپنا کردار ادا کرنا چاہئےاور متعلقہ پہلوؤں کے سلسلہ میں منطق اور دانشمندی کو اپنے کاموں میں سرفہرست رکھیں۔

بیان کے مطابق آیت اللہ سیستانی نے اجلاس میں تاکید کرتے ہوئے کہاکہ مختلف مذاہب اور افکار کے مابین حقوق کے احترام اور باہمی احترام کی بنیاد پر تمام معاشروں میں پرامن بقائے باہمی اور انسانی یکجہتی کے لئے مشترکہ کوششوں کو مضبوط بنانا بہت ضروری ہے،واضح رہے کہ آیت اللہ سید علی سیستانی اور پوپ فرانسس کی گفتگو نجف اشرف میں اس مرجع عالی قدر کی رہائش گاہ پر بند دروازوں کے پیچھے ایک گھنٹہ تک جاری رہی۔